“Bizi yaxşı rəqiblə oyun gözləyir”.

Prosport.Az xəbər verir ki, bu sözləri futbol üzrə Azərbaycan millisinin kapitanı Emin Mahmudov Qazaxıstan yığmasına qarşı keçirəcəkləri beynəlxalq yoldaşlıq oyunundan öncə təşkil olunan mətbuat konfransında deyib.

32 yaşlı yarımmüdafiəçi rəqibin müdafiədə yaxşı təsir bağışladığını və sürətli əks-hücumlara keçdiyini bildirib: “Son illər inkişaf ediblər. 2 il əvvəl onlarla qarşılaşmışdıq. Eyni səviyyədə oyun göstərmək və qələbə qazanmaq istəyirik. Milli komandanın forması altında hər matça qalibiyyət üçün çıxmalıyıq. Sabahkı görüşdə də azarkeşlərimizi qələbə ilə sevindirmək istəyirik”.

Qeyd edək ki, Macarıstanın Sombathey şəhərində yerləşən “Haladaş” İdman Kompleksinin stadionunda keçiriləcək qarşılaşma Bakı vaxtı ilə saat 18:00-da başlayacaq.