"Qarabağ" 2024/25 mövsümü öncəsi ilk transferini reallaşdırıb.

Prosport.Az xəbər verir ki, Ağdam təmsilçisi heyətini qapıçı Fabiyan Buntiçlə gücləndirib.

Almaniya vətəndaşlığına malik xorvat qolkiperlə 3 illik müqavilə imzalanıb. Dəri əlcək sahibi 2027-ci ilin yayına qədər "köhlən atlar"da çıxış edəcək. O, 97 nömrəli formanı geyinəcək.

27 yaşlı qapıçının son klubu 2022-ci ilədək şərəfini qoruduğu Portuqaliya təmsilçisi “Vizela” olub. O, bunadək karyerasına başladığı Almaniyanın “İnqolştadt” klubunda forma geyinib.

Qeyd edək ki, Fabiyan Buntiç Xorvatiyanın U-18 və U-19 milli komandalarında da çıxış edib.

11:15

“Qarabağ” yay transfer pəncərəsində ilk keçidini reallaşdırmaq üzrədir. Ağdam klubu uzun sürən axtarışdan və danışıqlardan sonra arzuladığı qapıçını tapıb.

Prosport.Az futbolinfo.az-a istinadən xəbər verir ki, müqavilə müddətini uzatmaqdan imtina edilən Andrey Lunyovu xorvat qolkiper əvəz edəcək. Portuqaliyanın “Vizela” klubundan transfer edilən Fabiyan Buntiç bu gün Bakıya gələcək. 27 yaşlı oyunçu tibbi müayinədən uğurla keçsə, onunla 3 illik müqavilə bağlanacaq.

Müqavilənin bütün detalları bəlli deyil. Transfer dəyəri 600 min avro göstərilən oyunçu üçün “Qarabağ”ın nə qədər ödədiyi bilinmir. Bununla belə, qolkiper üçün xərcə düşüldüyü dəqiqdir. Çünki onun klubu ilə gələn ilin yayında bitəcək müqaviləsi var idi.

Buntiç Almaniya vətəndaşlığına da sahibdir. 2013-cü ildən “Ştutqart”da yetişən qapıçı bu komandanın U-19 komandasına kimi yüksəlib, 2016-da “İnqolştadt”a keçib. Aşağı dəstə klubunda 6 il keçirən Fabiyan 2022-ci ildə “Vizela”ya yollanıb. Son mövsümdə bütün turnirlərdə 32 matça 62 top buraxan Buntiçin Xorvatiyanın U-18 və U-19 millilərində çıxış etdiyini də xatırladaq.

Heyətindəki bir çox legionerləri məhz Portuqaliyadan gətirən “Qarabağ”ın bu seçimi hardasa gözlənilirdi. Amma Fabiyan Buntiçin yüksək liqanı 18 komanda arasında 17-ci olaraq tərk edən “Vizela”dan gəldiyini də unutmayaq. Sirli qutu olan Almaniya doğumlu Fabianın etimadı doğruldacağına ümid edirik.

“Qarabağ” daha bir qapıçı axtarışındadır. Gürcüstan millisi ilə Avropa çempionatına yollanan Luka Quqeşaşvili də ağdamlılardan ayrılmaq istəyir.