Qadın futbolçular üzrə milli komandamız tarixində ilk dəfə Avropa çempionatına vəsiqə qazana bilər.
Prosport.Az-ın xəbərinə görə, hazırda B Liqasının 1-ci qrupunda mübarizə aparan millimizin Türkiyə üzərində qazandığı 1:0 hesablı qələbə Siyasət Əsgərovun yetirmələrinə bu baxımdan şans yaradıb.
Belə ki, 2025-ci ilin 2-27 iyul tarixlərində 16 ölkənin iştirakı ilə İsveçrənin 8 şəhərində AVRO-2025 keçiriləcək. İsveçrə (meydan sahibi olduğu üçün) və səkkizqat Avropa çempionu Almaniyanın (A Liqasındakı qrupda ilk 2 yeri təmin etdiyi üçün) artıq AVRO-2025-də iştirakı rəsmiləşib.
Ötən ilin sonunda C Liqasından B-yə vəsiqə qazanmış milli komandamız bu liqanın reytinqinə görə ən zəif komandası olsa da, Avropa çempionatına çıxmağa yaxındır. Avropa çempionatının təşkilatçısı olan İsveçrə yığması millimizin, Türkiyə və Macarıstanın yer aldığı 1-ci qrupda çıxış edir.
Qrupda nəticələr necə olub?
Komandamız apreldəki ilk görüşdə Macarıstanla 1:1 oynayıbsa, Bakıda İsveçrəyə darmadağın olub – 0:4. Mayda Türkiyəyə mübahisəli penalti qolu ilə uduzan millimiz dünən paytaxtımızda qardaş ölkə təmsilçisindən eyni hesabla revanş götürüb – 1:0. Bununla da komandamızın xal aktivi 4-ə çatıb. Düzdür, Macarıstan da ilk görüşdə uduzduğu lider İsveçrədən revanş almaqla (1:0) millimizlə xalları bərabərləşdirib. Komandamız yalnız top fərqinə görə Macarıstandan geri qalır. Lakin komandamız iyulun 12-də Mərdəkandakı "Liv Bona Dea Arena"da macarlara qalib gəlsə, o zaman nəinki 3-cü yeri, hətta 2-ci yeri ələ keçirə bilər. Çünki həmin vaxt 6 xala malik türklər də 9 xal qazanmış liderlə mübarizə aparacaq. Həmçinin, komandamızı iyulun 16-da Lozannada İsveçrə ilə ağır oyun gözləyir.
Turnirin formatı nə deyir?
Turnirin formatına görə, B Liqasının qrup lideri 2025/26 mövsümü üçün Millətlər Liqasında A Liqasına və AVRO-2025-ə çıxmaq üçün pley-offa vəsiqə qazanır. Hazırkı durumda İsveçrə Avropa çempionatına ev sahibliyi edəcəyindən, onları qrup lideri kimi yalnız A Liqasına vəsiqə maraqlandırır. Qrup 2-cisi və 3-cüsü isə pley-offlarda çıxış edəcək. Həmçinin, İsveçrə qrupda ilk 3 yerdən birini tutarsa, o zaman ən yaxşı qrup 4-cüsü də pley-offa qatılmaq hüququ əldə edəcək. Sona 2 tur qalmış 9 xalı olan İsveçrənin qrupda sonuncu olmayacağı dəqiqləşdiyindən, ən yaxşı qrup 4-cüsü bu şansdan yararlana biləcək. Millimiz hazırkı durumda (qrupu 4-cü yerdə bitirəcəyi halda) yenidən C Liqasına düşsə də, pley-offda mübarizə aparmaq şansı əldə edir. Çünki Azərbaycan hazırda ən yaxşı 4-cü yerdə olan komanda sayılır.
Pley-offlar necə olacaq?
Qeyd edək ki, pley-off mərhələsi 2 raunddan ibarət olacaq. İlk raund 23-29 oktyabrda, 2-ci raund 27 noyabr - 3 dekabr tarixlərində keçiriləcək. Qaliblər klassik ev-səfər prinsipi əsasında müəyyənləşəcək. Azərbaycan millisinin reytinqi aşağı olduğundan, pley-offlarda zəif komandaların olduğu səpələnməmişlər səbətində yer alacaq. Komandamız B Liqasının səpələnmiş yığması ilə ev-səfər prinsipi ilə pley-off oynayacaq. A/C Liqalarından gəlib pley-offun ilk raundunda qalib gəlmiş 8 komanda və B Liqasından gəlib pley-offun ilk raundunda qalib gəlmiş 6 komanda daha sonra 2-ci raundda üz-üzə gələcək. Burada yüksək reytinqli (səpələnmiş) komandalarla aşağı reytinqli (səpələnməmiş) komandalar Avropa çempionatına vəsiqə qazanacaq son 7 komandanı müəyyənləşdirəcək.
Bütün 16 komanda müəyyənləşdikdən sonra dekabrın 16-da final mərhələsinin püşkatması olacaq.
Səbuhi Musa
