Sponsorsuz qaldığı üçün "Kəpəz" legionerlərini saxlamaqda çətinlik çəkir.

Prosport.Az-ın xəbərinə görə, iyulun 1-dən sərbəst futbolçuya çevriləcək malili hücumçu Adama Nyan ölkə xaricində çıxış edə bilər. Onun xidmətində son mövsüm Hindistan Super Liqasını 5-ci sırada başa vurmuş "Kerala Blasters" klubu maraqlıdır.

Ötən ilin oktyabrından "Kəpəz"də çıxış edən Mali millisinin 30 yaşlı sabiq oyunçusu ilk növbədə Azərbaycandan olan təklifləri dəyərləndirəcək. Hazırkı durumda "Transfermarkt"da qiyməti 300 min avro qiymətləndirilən "Nant", "Troy", "Şarlerua", "Soşo"nun sabiq hücumçusu Azərbaycan Premyer Liqasında 18 oyuna 3, ölkə Kubokunda 2 matça 3 qol vurub. Nyan Azərbaycan Kubokunun 1/8 finalında "Sabah"a qarşı het-trik etməsi ilə diqqətləri üzərinə çəkməyi bacarmışdı.

"Kəpəz"in portuqaliyalı qapıçısı İqor Rodriqes isə "Səbail"in transfer siyahısındadır. 29 yaşlı qolkiper də Adama Nyan kimi bu ayın sonunda "Kəpəz"lə müqaviləsinin müddəti başa çatdığından, "Səbail"ə keçidi pulsuz başa gələcək. "Benfika"nın sabiq qolkiperinin hazırkı durumda transfer dəyəri 225 min avro göstərilir.

Qeyd edək ki, "Kəpəz"in gürcüstanlı yarımmüdafiəçisi Georgi Papunaşvilinin də "Sumqayıt"a keçdiyi deyilsə də, bu, həqiqəti əks etdirmir. Həmçinin, "Kəpəz"in belaruslu mərkəz müdafiəçisi Yeqor Xvalkonun da "Səbail"in maraq dairəsində olduğu bildirilir.