"Qarabağ" Azərbaycan Kubokunun finalında "Zirə"ni 2:1 hesabı ilə məğlub edərək 8-ci dəfə turnirin qalibi olub.

Prosport.Az xəbər verir ki, Ağdam təmsilçisinin baş məşqçisi Qurban Qurbanov oyundan sonra təşkil olunan mətbuat konfransında jurnalistlərin suallarını cavablandırıb:

– Kubokun finalı yaxşı, baxımlı, dinamik oyunla mövsümə damğa vurdu. Azarkeşlərimizə təşəkkür edirəm. Qarşımızda dinamik, istəkli komanda var idi. Sona qədər təslim olmadılar. "Zirə" çox ağıllı müdafiə olunurdu. Onlara bu gün alqış düşür, çox yaxşı mövsüm keçirdilər. Rəhbərliklərinə də uğurlar arzulayıram. Futbolçularım çempionluğu və Kuboku qazandı. Çox uğurlu mövsüm keçirdik, böyük işlər gördük. Uğurdan sonra bəzən istər-istəməz futbolçularda istək azalır. Amma çalışacağıq, istəyi çoxaldaq ki, yeni mövsüm daha yaxşı olsun.

– Bugünkü matç Maksim Medvedevdən başqa, kimin üçün sonuncu oldu?
– Maksim karyerasını bitirdi. Hansısa ayrılıq olanda klub tərəfindən açıqlanacaq. Burada deməyim düzgün çıxmaz.

– Son illərdə mükafatlandırma mərasimində olmamağınızın səbəbi nə idi?
– Elə bir səbəbi yoxdur. Sadəcə, bunu futbolçular haqq edir. Say çox olur. Həmişə məni görürsünüz, qarşınızda oluram. Futbolçularımın mükafatlandırmaya çıxmaları bəs edir.

– 2-ci dueldə də Rəşad Sadıqov sizə uduzdu. Onun komandasının sizə qalib gəlməsi üçün neçə il lazımdır?
– Bu suala necə yanaşım bilmirəm. Hesabda uduzdular, amma... Onların büdcəsi ilə bizim büdcəmiz eyni deyil. Amma onların performansını görürsünüz. Ölkə çempionatına baxsaq, qrandlarımız 3-4-cü yerləri tutdu, Rəşad Sadıqovun komandası isə 2-ci yeri. Dərindən düşünsək, çox böyük iş görüblər. Bu gün də həmin büdcə ilə 2-ci olub, Kubokda finala çıxdılar, son dəqiqələrdə uduzdular. Bu, qalibiyyətə bərabər nəticədir. "Zirə"nin fəaliyyətinə, büdcəsinə görə bəlkə də Rəşad bizə qalib gəldi.

– Aleksey İsayev nə vaxt effekt verəcək?
– Mən ondan razıyam. Komandadakı rəqabəti görürsünüz. Əgər 11 futbolçu ilə mövsümü başa vura biləcəyimizi düşünsək, başqa oyunçu götürmərik. Sadəcə, rəqabəti artırmaq lazımdır. Futbolçularım da özlərini yaxşı tərəfdən göstərir. Alekseyə güvənirəm.