"Zirə" Azərbaycan Kubokunun finalında "Qarabağ"a 1:2 hesabı ilə məğlub olub.

Prosport.Az xəbər verir ki, "qartallar"ın baş məşqçisi Rəşad Sadıqov matçdan sonra keçirilən mətbuat konfransında jurnalistlərin suallarını cavablandırıb:

– Futbolçularımı təbrik etmək istəyirəm. İlk yarıda meydanda taktiki savaş getdi. Son zamanlar "Qarabağ" ilk yaxaladığı epizodu qola çevirir. Bu gün də belə oldu. İlk təhlükəli epizodları qolla nəticələndi. 2-ci yarıda hücumameyilli oynadıq, rəqibə təzyiq etdik. Meydanda açıq futbol getdi. Azarkeşlər xüsusən 2-ci hissədən zövq aldı. Doğru yanaşsaq, bu matçın bizə çox köməyi olacaq. 40 gündən sonra bu səviyyəyə yaxın komanda ilə oynayacağıq. Orada da bu istək, eyni ustalıq, iradəyə ehtiyacımız olacaq. Futbolçularım da bu oyunu yaxşı analiz etməlidir. Titul olanda "Qarabağ" kimi rəqiblər maksimumu edir. Oyunçularım layiqli mübarizə apardı. Oyunu əlavə dəqiqələrə apara bilərdik. Futbolçularımla fəxr edirəm.

– Taktiki sxem və start heyəti ilə təəccübləndirdiniz. Bu, avropalı həmkarlarınızda gördüyünüz bir şeydir?
– Çox məşqçi bu tip oyuna üstünlük verib. İlk yarıda rəqibə qarşı etibarlı oynamaq istəyirdik. "Qarabağ" kimi komandalar qol vurduqdan sonra rahatlaşıb, daha özünəinamlı oynayır. Biz də 2-ci yarıda hücum potensialını artırmağı düşünürdük. 2 il əvvəl oynadığımız eyni oyun sistemidir. Sadəcə, futbolçular fərqli idi. Planımız eyni idi. "Qarabağ"ı mərkəzdə qarşılayıb, aqressiv oynayaraq, rəqibə oynamağa imkan vermək istəmirdik. Rəqib 43-cü dəqiqədə qol vurubsa, demək ki, planımız işlədi. Qapımıza zərbə vurmaqda çətinlik çəkirdilər. Bu gün əsas heyətdə olmayan futbolçularla da danışmışdıq ki, 60-cı dəqiqədən hücumameyilli oyunçuları meydana buraxacağıq.

– UEFA Avropa Liqası öncəsi hansı dəyişikliklər etməlisiniz ki, uğurlu olasınız?
– Hər bir komandanın mövsümün əvvəlində yenilənməyə, güclənməyə ehtiyacı var. Seleksiyalarımızı aparırıq. Çalışacağıq ki, heyətimizi gücləndirək. İndi seçim etmək üçün qıtlıqdır. Mütləq şəkildə güclənməliyik. Necə olacağını zaman göstərəcək.