Azərbaycan boksçusu Loren Alfonso Paris-2024 Yay Olimpiya Oyunlarına lisenziya qazanıb.

Prosport.Az xəbər verir ki, 92 kq çəkidə mübarizə aparan Kuba əsilli dünya çempionumuz Olimpiadaya vəsiqəni Tailandın paytaxtı Banqkokda keçirilən II Dünya Olimpiya Təsnifat Turnirində rəsmiləşdirib.

O, 1/4 finalda Elkin Adilbəy Oğlu (Qırğızıstan) ilə qarşılaşıb. Alfonso rəqibini 5:0 hesabı ilə məğlub edərək yarımfinala yüksəlib və bu qələbə boksçumuza Paris-2024-də iştirak hüququ verib.

Nəticədə milli komandamız Fransa paytaxtında 5 kişi boksçu ilə təmsil olunacaq. Loren Alfonsodan öncə Nicat Hüseynov (51 kq), Malik Həsənov (63,5 kq), Murad Allahverdiyev (80 kq) və Məhəmməd Abdullayev (+92 kq) Paris Olimpiadasına vəsiqəyə yiyələnib.

Qeyd edək ki, Olimpiya Oyunlarda boks yarışları iyulun 27-dən avqustun 10-dək davam edəcək.