"Zirə" Azərbaycan Kubokunun finalında "Qarabağ"la üz-üzə gələcək.
Prosport.Az xəbər verir ki, "qartallar"ın baş məşqçisi Rəşad Sadıqov oyundan öncə təşkil olunan mətbuat konfransında jurnalistlərin suallarını cavablandırıb:
– Mövsümün son oyunudur. Kubokun finalına həmişə hazırlıq yaxşı olur, bayram əhval-ruhiyyəsi yaşanır. Biz də bayramın bir parçası olacağıq. Böyük ajiotaj var. Biletler satılıb, azarkeşlər oyuna böyük maraq göstərir. Bu da matçın daha maraqlı keçməsinə səbəb olacaq. 2 il əvvəl də finalda oynamışdıq. Onda da maraqlı, gərgin mübarizə getmişdi. Sonda "Qarabağ" penaltilərdə daha dəqiq olub qalib gəldi. İstəyərdik ki, eyni ab-hava bu görüşdə də olsun. Başa düşürük ki, "Qarabağ" ciddi rəqibdir. Ötən il olduğu kimi, bu mövsüm də avrokuboklarda 1/8 finalına qədər irəliləyiblər. Öz bacarığımızı, oyunumuzu nümayiş etdirmək istəyirik ki, sonda sevinən tərəf olaq. Oyundan qabaq danışmaq həmişə çətindir. Bütün fikrimiz final matçındadır. Çalışacağıq ki, rəqibə layiqli müqavimət göstərək, gərgin oyun getsin.
– 2 il əvvəlki final ssenarisinin təkrarlanmasını gözə almısınız?
– Finalda hər şey ola bilər. Sabah necə olacaq, proqnoz vermək çətindir. Uğurlu nəticə ilə ayrıla bilərik.
– UEFA Avropa Liqasında potensial rəqibləriniz bəllidir. Yəqin ki, onlar sizi izləyəcək. Kuboku qazanıb rəqiblərinizə əzəmətli komanda kimi özünüzü göstərmək istəyirsiniz?
– Əvvəlcədən nəsə demək çətindir. Bütün fikrimiz sabahkı matçla bağlıdır. Təbii ki, uğurlu oynamağın rəqiblərin sənə qarşı ciddi yanaşmasına səbəb olacaq. Çünki sabah rəqibimiz "Qarabağ"dır. Avrkuboklarda oyunlar daha fərqli keçəcək. İndi "Qarabağ"la matçı düşünürük.
– Heyətdə itkiləriniz var?
– Rüstəm Əhmədzadə, Məqsəd İsayev, Cibrilla İsa uzun müddət zədəli olub, tam formalarını bərpa etməlidirlər. Hər üçünün formada olmasına ehtiyacımız var. Futbol zədəsiz, cəzasız olmur. "Qarabağ"ın da itkiləri var. İtkilər o qədər də önəm kəsb etməyəcək.
– 2 il əvvəl finalda oynayan “Zirə” ilə indikini necə müqayisə edərdiniz? 2-ci yeri artıq tutmusunuz. Bu sizə rahatlıq verəcək?
– Bəzən görürsən, xeyri olur, bəzən fərlqi olur. Onu oyundan sonra dəyərləndirə biləcəyik. 2 il əvvəllə müqayisədə hər iki komanda inkişaf edib. Bu mövsüm "Qarabağ" rekord nəticə əldə edib. "Zirə" də tarixinin ən yaxşı nəticəsini göstərib. Hər iki komanda inkişaf edib, daha yaxşıdır.