Qadın voleybolçulardan ibarət Azərbaycan millisi Qızıl Avropa Liqasında növbəti qələbəsini qazanıb. 

Prosport.Az xəbər verir ki, ölkəmizin ev sahibliyi etdiyi III turun ilk oyununda komandamız Estoniya yığması ilə üz-üzə gəlib. 

Qarşılaşmaya daha üstün başlayan Faiq Qarayevin baş məşqçisi olduğu komanda təşəbbüsü sonadək qoruyub və meydandan 3:0 (25:21, 25:12, 25:20) hesablı qələbə ilə ayrılıb.

Qeyd edək ki, bundan əvvəl Xorvatiyanı 3:0 hesabı ilə məğlub edən qadın voleybolçularımız Slovakiya (1:3), Rumıniya (0:3) və İsveçə (0:3) məğlub olub. 6 xalla 7-ci yerdə olan yığmamız iyunun 2-də Avstriya ilə qarşılaşacaq.

Kişi voleybolçulardan ibarət millimiz isə səfərdə Estoniya millisinin qonağı olub. Fərid Cəlalovun rəhbərlik etdiyi komanda rəqibinə 0:3 (14:25, 15:25, 17:25) hesabı ilə uduzub.

Qeyd edək ki, kişilərdən ibarət milli bundan əvvəlki matçlarda Rumıniya, Ukrayna, Belçika və Şimali Makedoniyaya 0:3 hesabı ilə məğlub olub. Komandamız sonuncu – 12-ci yerdədir. Azərbaycan millisi iyunun 1-də Lüksemburqla qarşılaşacaq.