"Bu yaxınlarda Kolumbiya və Argentinada səfərdə oldum. Səfərim sırf futbolla bağlı idi. Argentina, Kolumbiya, Braziliyadan oyunçu transferləri fikirləşirik. Bunun üçün ikitərəfli əlaqələr qurmuşuq. Onlar bizə akademiyamızın inkişafı üçün də dəstək olacaq. Yəni, İmişlidə Argentina proqramından istifadə edəcəyik. Bunu Argentinanın ən böyük futbol akademiyasının rəhbəri ilə etməyə çalışacağıq. İnşallah, bu məsələləri növbəti mövsümdə dəyərləndirəcəyik".

Bunu Prosport.Az-a açıqlamasında "İmişli" klubunun İdarə Heyətinin sədri Kamran Eyyubov deyib.

O, ötən ay Cənubi Amerikaya olan səfərinin təfərrüatlarını açıqlayıb: "Boka Xunyors", "River Pleyt", "Arxentinos Xunyors" və Argentinanın ilk Libertadores Kubokunu qazanan klubu "Rasinq"in bazasında olduq. Dyeqo Armando Maradonanın adını daşıyan stadiona baş çəkdik. Kolumbiyada "Santa Fe" klubunda olduq. Bütün bu klublarla sıx əlaqələrimiz olacaq".

Klub rəhbəri həmçinin onu bildirib ki, bu planların çoxu Premyer Liqa üçün nəzərdə tutulsa da, I Liqada da bu əməkdaşlıqdan yararlanacaqlar: "Oradan 18-21 yaşlı oyunçuları bura gətirib, onları yetişdirib, daha sonra digər klublara satmaqla "İmişli"ni ayaqda saxlamağı fikirləşirik. Premyer Liqada çıxış etsəydik, daha yaxşı oyunçular gətirə bilərdik. Ancaq I Liqada da həyat davam edir. Biz bu layihəni burada da tətbiq etməyə çalışacağıq".