"Qarabağ"ın "Hədəf" qrupları sayılan 13, 14 və 15 yaşadək komandaları AFFA-nın keçirdiyi pley-off mərhələlərində də uğurlu çıxışı ilə yadda qalmaqdadır.
Prosport.Az-ın xəbərinə görə, paytaxt (Bakı) zonasında lider "Sabah"la eyni xalı (63) toplamış "Qarabağ"ın U-13 komandası 1/8 finalda "Turan Tovuz"u (2:2, 2:1) adlamışdısa, 1/4 finalda "Metak"a gücünü göstərib. Siyəzən şəhər stadionunda keçirilmiş ilk görüşdə 1:1 hesabı qeydə alınmışdısa, bu dəfə Cüdo Federasiyasının təlim-məşq mərkəzindəki stadionda "köhlən atlar" rəqibini darmadağın edib – 9:1. Qolları İbrahim Rza (3), Raul Hüseynli (2), Timuçin Yəhya, Hüseyn Novruzlu, Daniel Medvedev və Fərid İsrafilli fərqlənib. Elşad Xudadatovun komandasının yarımfinaldakı rəqibi güclü "Vətən" İOEUGFMPHŞ olacaq. İlk matç sabah saat 16:30-da Cüdo Federasiyasının təlim-məşq mərkəzindəki stadionda keçiriləcək.
Paytaxt (Bakı) zonasını 57 xalla 2-ci pillədə başa vurmuş "Qarabağ"ın U-14 komandası 1/8 final mərhələsinin cavab oyununda müntəzəm çempionatın 4-cüsü "Neftçi" ilə qarşılaşıb. "Sərhədçi" İdman Mərkəzinin stadionunda keçirilən matç komandamızın böyük hesablı qələbəsi ilə nəticələnib – 4:0. Qollara Daniil Rəcəbov (2), Əli Bəşirov və Fəqan Mustafayev (avtoqol) imza atıb. Xatırladaq ki, bu komandalar arasında ilk görüş 1:1 hesablı bərabərliklə başa çatıb. Asif Əlizadənin yetirmələri 1/4 finalda müntəzəm çempionatın 3-cüsü "Sumqayıt"la "Kapital Bank Arena"da qarşılaşacaq.
Müntəzəm çempionatı 78 xalla lider kimi tamamlamış "Qarabağ"ın U-15 komandası Qətərdə olduqları üçün 1/4 final mərhələsinin təxirə salınmış ilk oyununda muxtar respublikanın qalibi "Araz Naxçıvan"la qarşılaşıb. "Sərhədçi" İdman Mərkəzinin stadionunda keçirilən matç Ağdam komandasının böyük hesablı qələbəsi ilə nəticələnib – 10:2. "Qarabağ"ın qollarını Murad Quluzadə (2), Amin Rzayev (2), Onur Əliyev (2), Əli Bəşirov (2), Murad İbrahimli və Riad Qaradağlı vurub. Qeyd edək ki, bu komandalar arasında cavab görüşü 2 iyun tarixində eyni məkanda baş tutacaq. Bu dəfə Vüqar Əsgərlinin baş məşqçisi olduğu komanda meydan sahibi sayılacaq.