Ümumdünya Güləş Birliyi (UWW) Bakıda keçirilmiş Avropa Olimpiya Təsnifat Turnirində Frank Çamiso (İtaliya) – Turan Bayramov (Azərbaycan) görüşü ilə əlaqədar cəzalanmış hakimləri bağışlayıb.

Prosport.Az-ın xəbərinə görə, onların verdikləri apellyasiya şikayətlərinə baxılıb.

Həmin görüşün hakimlik rəsmiləri olan Aleksey Bazulin (Rusiya), Roman Pavlov (Ukrayna), Halil İbrahim Cicioğlu (Türkiyə), Kamel Buaziz (Tunis) və Keysi Qösslin (ABŞ) müraciətlərinə UWW Apellyasiya Komitəsi baxaraq burada qərəz olmadığı, sadəcə hakim səhvləri olduğu barədə qərar çıxarıb. İş yenidən UWW İntizam Komitəsinə baxılması üçün göndərilib.

İntizam Komitəsi isə həmin görüşdə Hakimlər Komissiyasının nümayəndələri olan Buaziz (həmçinin, Hakimlər Komissiyasının vitse-prezidentidir – red.), Cicioğlu və Qösslin cəzasını 31 mayadək azaldıb. Onlar Olimpiadada yalnız xalça hakimləri üzrə sədr ola bilər. Həmin görüşdə xalça hakimləri üzrə sədr olmuş Bazulinə qarşı da cəza 31 mayadək azaldılıb. O isə Olimpiadada yalnız hakim kimi fəaliyyət göstərə bilər. Həmin görüşdə xalça hakimi olmuş Pavlovun cəzası isə 30 sentyabradək endirilib.

Qeyd edək ki, əvvəl Roman Pavlov və İbrahim Cicioğlunun cəzası 31 dekabradək, Aleksey Bazulin, Kamel Buaziz və Keysi Qösslin cəzası 30 iyunadək nəzərdə tutulmuşdu. Yalnız kənar hakim Ali Sayvan (İraq) barədə yeni qərar çıxarılmayıb. Onun cəzası 30 sentyabradək nəzərdə tutulub.

Səbuhi Musa