"Premyer Liqada qalibin mükafatlandırma mərasimi ötən mövsümlərdəkindən fərqlənirdi. Tək Premyer Liqa yox, I Liqanın da kubok və qızıl medallarını yeni dizaynda hazırlatmışdıq. Çalışdıq ki, mükafatlandırmanı da yadda qalan edək. "Qarabağ"la birgə təşkilati işləri üzərimizə götürdük. Futbolçuların xüsusi mahnılarla meydana daxil olub qızıl medallarını alması təklifi "Qarabağ"dan gəlmişdi və biz də PFL olaraq buna razılıq vermişdik".

Bunu Prosport.Az-a açıqlamasında PFL prezidenti vəzifəsini icra edən qurumun texniki-idman direktoru Elgiz Abbasov deyib.

O, iyunun 2-də "Qarabağ" və "Zirə" arasında "Liv Bona Dea Arena"da keçiriləcək Azərbaycan Kubokunun final qarşılaşmasında yeniliklərin olacağını da bildirib: "Azarkeşlərin və KİV nümayəndələrinin Mərdəkan qəsəbəsində yerləşən stadiona gediş-gəlişini təmin etmək üçün layihələr planı hazırlamışıq. Bildiyiniz kimi, biletlər artıq satışdadır. Biletləri Tofiq Bəhramov adına Respublika stadionunun və "Liv Bona Dea Arena"nın kassalarından almaq mümkündür. Finalda xalq artisti Aygün Kazımovanın ifası nəzərdə tutulub. Eyni zamanda oyundan öncə azarkeşlər üçün maraqlı açılış mərasimi baş tutacaq".