“Qələbəni Azərbaycan xalqına həsr edirəm. Arenada çoxlu azarkeş vardı. Əsl izdiham yaşanırdı. Qızıl medal onların haqqı idi. Məşqçilərim Cəbrayıl Həsənov və Şərif Şərifova təşəkkürümü bildirirəm. Onların dediyi kimi etdim. Həkimimiz Müşfiq müəllimə də çox minnətdaram. O da bizim üzərimizdə yarpaq kimi əsir. Bütün qarşılaşmalarımızda yanımızdadır, bizi zədələrdən xilas edir".

Bunu Prosport.Az saytına açıqlamasında Bakıda keçirilmiş 23 yaşadək güləşçilərin Avropa çempionatında qızıl medal qazanan Cəbrayıl Hacıyev deyib.

Milliyyətcə ləzgi olan 22 yaşlı idmançı 3-cü dəfə U-23-lər arasında Avropa çempionu olub. 17 yaşından Azərbaycanda məşq edən Cəbrayıl finalda 6:5 məğlub etdiyi Rusiya idmançısı Kamil Əbdülvahabovla əvvəllər qarşılaşmadığını bildirib:

"İlk dəfə idi ki, bu rəqiblə qarşılaşırdım. Ancaq təbii ki, onu tanıyırdım. Bilirdim ki, mənim kimi Dağıstandandır".

Cəbrayıl Hacıyev növbəti hədəf və əsas yığmada 74 kq çəki dərəcəsində heyətə düşmək barədə bunları deyib: "Hədəflərimdən biri Los Anceles Olimpiadasında qızıl medal qazanmaqdır. Hər bir idmançının arzusu bu oyunlarda iştirak etməkdir. Düzdür, milli komandada gərgin rəqabət var. Bu da yaxşı haldır. Qoy ən güclü olan 1-ci nömrə olsun. Ölkə xaricində biz hamımız azarkeş olaraq bir-birimizi dəstəkləyirik. Kollektiv daxilində rəqibik. Sağlam rəqabət var. Əsas yığmanın heyətində olmaq üçün son qərarı məşqçilər heyəti verəcək”.

Qeyd edək ki, 31 ölkədən 365 güləşçinin qatıldığı Avropa çempionatında Azərbaycan sərbəst güləşdə 1 qızıl, 2 gümüş və 2 bürünc medal qazanmaqla, yunan-Roma güləşində 3 qızıl, 1 gümüş və 4 bürünc medal əldə etməklə 1-ci olub. Qadın güləşində millimiz 1 qızıl, 1 gümüş və 1 bürünc medal qazanmaqla Azərbaycan Ukrayna və Türkiyədən sonra 3-cü yeri tutub. Ümumilikdə isə ölkəmiz 5 qızıl, 4 gümüş və 7 bürünc medalla bütün ölkələri qabaqlayıb.