"Səbail" Azərbaycan Premyer Liqasının sonuncu – XXXVI turunda səfərdə "Zirə"yə 0:1 hesabı ilə məğlub olub.

Prosport.Az xəbər verir ki, "dənizçilər"in baş məşqçisi Şahin Diniyev matçdan sonra keçirilən mətbuat konfransında jurnalistlərin suallarını cavablandırıb:

– Gərgin oyun oldu. Komandam məğlub olmaq istəmirdi. Pedru Nununun olmaması bizə hücumda problem yaratdı. 10 nəfərlə xarakter göstərdik. Bərabərlik qolunu vurmaq alınmadı. "Zirə"ni təbrik edirəm. Hər şeyi məndən öyrənin, "sarı mətbuat"dan yox. İllərdir ki, futbolun içindəyəm, hamını tanıyıram.

– Belə xəbərlər var idi ki, bu oyunda qələbə qazanmaq üçün sizə pul təklif olunub. Bu, nə dərəcədə doğrudur?
– Elə şey olmayıb. Balalarımın canına and olsun ki, belə bir şey yoxdur. Biz olan yerdə ola da bilməz.

– Mətbuat konfransına Rəşad Sadıqovdan sonra gəlməyinizin səbəbi nədir?
– Komandanın sponsoru Rauf müəllim ("Azərbaycan Xəzər Dəniz Gəmiçiliyi" Qapalı Səhmdar Cəmiyyətinin sədri, klubun İdarə Heyətinin sədri Rauf Vəliyevi nəzərdə tutur – red.) gəlmişdi. Onu orada qoyub çıxmaq düz olmazdı.

– Vərəqələrin çox olması intizamsızlıqla, yoxsa hakim səhvləri ilə əlaqədardır?
– 9-cu dəqiqədə 2 sarı vərəqə var idi, hər şey aydındır. Hakimlərə təşəkkür edirəm. Deməzdim ki, komandamda intizamsızlıq var. Avropada ilk epizodda heç vaxt sarı vərəqə vermirlər. Belə olanda futbolçu mübarizədən çəkinir.

– Klubdakı gələcəyiniz necə olacaq?
– Bu komanda ötən mövsüm 9-cu yeri tutmuşdu. Əgər bu il 10-cu olsaydıq, mən uğursuz idim. Belə olsaydı, özüm qalmazdım. Hardan ayrılmışamsa, özüm getmişəm. Məni heç vaxt istefaya göndərməyiblər. Futbolda 3 il vaxt lazımdır. Qərar rəhbərliyindir. İşimi vicdanla görmüşəm. Həftənin 2-ci günü klubun İdarə Heyətinin iclası olacaq. Nə qərar versələr, hörmətlə yanaşacağam. Onu deyə bilərəm ki, ötən mövsümlə indiki "Səbail"in büdcəsində fərq yoxdur, eynidir. Bəzilərinin qərəzli yazdıqlarına fikir verməyin.