AFFA Region Liqasının qalibi müəyyənləşib.

Prosport.Az xəbər verir ki, Şamaxı şəhər stadionunda baş tutan həlledici matçda “Şimal” (Xaçmaz) və “Haypers” (Bakı) komandaları üz-üzə gəlib.

Oyunun əsas vaxtı 1:1 hesabı ilə nəticələndiyindən, qalibi müəyyənləşdirmək üçün əlavə vaxta ehtiyac duyulub. Burada da hesab bərabər olduğu üçün çempion komandanın adına penaltilər seriyasında aydınlıq gəlib. 11 metrlik cərimə zərbələrini daha dəqiq yerinə yetirən “Şimal” kollektivi 2023/2024 mövsümündə Region Liqasının qalibi adını qazanıb.

Bu nəticənin ardından millimizin və "Xəzər Lənkəran"ın sabiq futbolçusu Tural Cəlilovun baş məşqçisi və kapitanı olduğu "Şimal" yeni mövsümdən etibarən II Liqada oynamaq və Azərbaycanı UEFA Regionlar Kubokunda təmsil etmək hüququ əldə edib. Məğlub olan millimizin və "Qarabağ"ın sabiq futbolçusu Vüqar Nadirova məxsus olan “Haypers” isə II Liqanı 13-cü sırada tamamlayan “Şəfa” ilə pley-off matçına çıxacaq.

Qeyd edək ki, mayın 19-da "ASCO Arena"da "Ümid" (Saatlı) "Göyəzən"ə (Qazax) 7:2 qalib gələrək bürünc medallara sahib çıxıb.