I Liqadada debüt edən, lakin 13 xalla sonuncu – 10-cu olan "Araz Saatlı" klubunun prezidenti Ədalət Abdullayevin Prosport.Az saytına müsahibəsi
– Son turda I Liqanın qalibi "Şamaxı"ya qarşı hücum futbolu nümayiş etdirdiniz. Öncəki tur çempionluğa oynayan "İmişli"ni məğlub etdiniz. Amma ümumilikdə çempionatda sonuncu oldunuz. Mövsümü necə dəyərləndirirsiniz?
– İlk mövsüm bizim üçün ağır oldu. İdman prinsiplərinə riayət olunması, minimum da olsa lisenziya şərtlərinə cavab verməyimiz I Liqada çıxış etməyimizə səbəb oldu. Bu 1 il ərzində peşəkarlaşdıq. Yaxşı təcrübə toplaya bildik. 1 Kubok matçı da daxil olmaqla, 28 oyun keçirdik. 4 qələbə qazanıb, 1 heç-heçə etdik. Düşünmürəm ki, pis mövsüm keçirdik. Təcrübə qazanmağımız baxımdan yaxşı mövsüm alındı.
– Düşünmürsünüz ki, I Liqada çıxış etməkdə tələsdiniz?
– Açığı, heç vaxt o haqda düşünməmişik. Bəlkə də II Liqada çıxış etsəydik, daha səmərəli olardı. Bəzi şeylər var ki, danışmaq alınmır. Rayon şəraitində klub saxlamaq çox çətindir. Bizim aylıq 1000 manat təklif etdiyimiz futbolçu 500 manata paytaxt klubunda oynamağı daha üstün tuturdu. Saatlıq kiçik rayondur, peşəkar futbol ənənələri yoxdur. Ona görə də keyfiyyətli futbolçu cəlb etmək çətin idi. Biz daha çox bundan əziyyət çəkdik. Sponsorumuz yoxdur ki, futbolçulara böyük məbləğlər təklif edək. Son 2 ayda yeni bazada işlər görülür. Saatlıda bir hoteldən baza olaraq istifadə edəcəyik. Orada bizim 35x75 ölçüdə məşq meydançamız, 7-8 nəfərin qala biləcəyi kotteclər olacaq. Klubun ofisi də orada yerləşəcək. Oyunlarımızı isə növbəti mövsümdən də Saatlı Olimpiya İdman Kompleksində keçirəcəyik.
– Bizim klub rəhbərliklərində belə bir psixologiya var. Klub aşağı diviziona düşdüsə, dağılmağa məhkumdur. Sizin sözünüzdən belə anlaşılır ki, hətta komanda II Liqada da mübarizəni davam etdirəcək...
– Əlbəttə. Bu sualı "Qəbələ"nin idman direktoru Səbuhi Səfiyarlıya da çox verirlər. Məncə, 90-cı illər və 2000-ci illərin əvvəllərindəki mağara təfəkkürü ilə yanaşma artıq geridə qalmalıdır. Bu, faciə deyil və nə də son deyil. II Liqa var, orada davam edəcəyik (müsahibə bu gün PFL-in pley-off oyunları ilə bağlı məlum açıqlamasından öncə götürülüb – red.).
– Kluba öz maliyyə imkanlarınızdan başqa kim kömək edir?
– AFFA-dan ayrılan dotasiya hesabına klubu saxlayırıq. Saatlıdakı pambıq zavodu kiçik də olsa kömək edir. Rayon icra hakimiyyətinin başçısı cənab Elmir Bağırov dəstək olur, onun davamlı diqqətini hiss edirik. İş adamı Mircavan Kazımov (sabiq prokurordur – red.) isə öz hotelini baza kimi istifadə etmək üçün bizə verib.
Səbuhi Musa
