"Şamaxı"nı I Liqada çempion edən baş məşqçi Ramiz Məmmədovun Prosport.Az saytına müsahibəsi
– Qaliblər mühakimə olunmur. Lakin son turda "Araz Saatlı"nın qolundan sonra sanki komandanızda psixoloji təzyiq yarandı...
– Öncə klubumuzu təbrik edirəm. Futbolçularıma təşəkkürümü bildirirəm. Verdiyimiz tapşırıqları düzgün yerinə yetirdilər. Komandada arxayınlıq yox idi. Dəfələrlə demişəm ki, 2-ci dövrədən sonra zəif komanda yoxdur. Bunu da bilirdik. "Araz Saatlı" ilə matç dediklərimin ən bariz nümunəsi oldu. Oyunun gərginliyini gördünüz. “Araz Saatlı”ya təşəkkür edirəm ki, sona qədər intriqanı qorudu, mübarizə apardı. Qələbə komandanın 1 ildə çəkdiyi əziyyətin bəhrəsidir. Komandada arxayınlıq var idi ki, bu matçda qələbə qazanacağıq. 1:0 da olsa, 3:1 də olsa, qələbə əldə etməliydik. Buna inanırdıq.
– Baş məşqçi kimi Premyer Liqada sonuncu dəfə "Keşlə" ilə olmuşdunuz. Yenidən Premyer Liqada ola bilərsiniz. Bu barədə təəssüratınız necədir?
– Mənim üçün bir o qədər də fərqi yoxdur. Bilirsiniz ki, yetərincə təcrübəmiz var. “Şamaxı”nın Premyer Liqadan düşüb, yenidən elitaya qalxması mənim üçün daha önəmli idı. Futbolsevərlərin xoşbəxt olması mənim üçün daha vacib idi.
– “Qəbələ”nin qurucularından biri olmusunuz. Hazırda da “Şamaxı” elə məhz “Qəbələ”ni əvəzləyəcək. Bu haqda düşüncələriniz maraqlıdır...
– “Qəbələ” həm sevimli klublarımızdan biridir, həm də sevdiyimiz şəhərlərdən birini təmsil edir. İnanıram ki, onlar da bizim kimi yenidən elitaya yüksələcək. Komandaya uğurlar arzulayıram.
– Fasilədə “Mingəçevir” – “Qaradağ Lökbatan” matçının hesabına nəzər yetirdinizmi?
– Tam səmimi deyəcəyəm. Bunu bütün klub işçiləri təsdiqləyər ki, heç bir rəqibin matçını izləməmişəm. Bunun mənim üçün önəmi yoxdur. Mənə yalnız öz komandamın çıxışı maraqlıdır.
– “Şamaxı”nın yerli futbolçularla oynamaq prinsipinə hamımız bələdik. Premyer Liqada hədəf yenə eyni olacaq?
– İlk gündən klub rəhbərliyinin strategiyası azərbaycanlı futbolçuların inkişafı olub. Bu haqda yenə də düşünəcəyik. Rəhbərliklə yenidən danışıqlar aparacağıq. Məlumat olan kimi sizinlə bölüşəcəyik.
– I Liqada elə bir futbolçu var ki, özünüzlə Premyer Liqaya aparmağı planlaşdırırsınız?
– Elə futbolçu çoxdur. Ad çəkməyə ehtiyac yoxdur. Hər birini baxışa çağıracağıq.
– Sizin aqibətiniz necə olacaq? Komandada qalacaqsınız, yoxsa başqaları kimi aşağı liqada əziyyət çəkib, Premyer Liqada “Şamaxı”nı tərk etməli olacaqsınız?
– Sağlıq olsun. Yaşayıb görəcəyik. Bütün fikirlərə hörmətlə yanaşıram. Əsas odur ki, “Şamaxı” Premyer Liqada olsun. Qalan şeyləri görəcəyik.