II Liqanın ilk çempionu "Baku Sportinq" klubunun icraçı direktoru Hüseyn Rzayevin Prosport.Az saytına müsahibəsi
– Çempion oldunuz. Əvvəldən qarşınıza II Liqanın çempionluğu qoyulmuşdu, yoxsa mövsümün gedişatında bu məqsəd formalaşdı?
– Əvvəla, yeni yaradılmış çempionatda qalib olmaq qürurverici haldır. Hədəf ilk gündən 1-ci yer olub. Bunun üçün də bütün işlərimizi – istər büdcə, istərsə də infrastruktur baxımından bu yöndə qurmuşduq.
– Baş məşqçi Elman Sultanovla yola davam edəcəksiniz?
– Əlbəttə. Onunla 5 illik müqavilə bağlamışıq. Hələ 4 ili qalıb.
– I Liqada iddialı çıxış üçün artıq daha çox büdcə tələb olunur. Bunun üçün hansısa sponsorların cəlb olunması mümkündür?
– Düzgün vurğuladınız. I Liqa komandaların maliyyəsi baxımından tam fərqli çempionatdır. Hazırda büdcənin artırılması ilə bağlı işlər gedir. II Liqaya yetər dərəcədə 2-3 sponsorumuz var. I Liqada rəqabətədavamlı çıxış etmək üçün bizimlə eyni düşüncə tərzində olan sponsorlar tapmaq istəyirik.
– I Liqada hədəf nə olacaq?
– Məncə, hazırda bu haqda danışmaq tezdir. İstənilən halda, hədəfimiz minimum ilk "3-lük"də yer tutmaq olacaq. Əlbəttə ki, yüksək yer uğrunda mübarizə aparacağıq. Başqa variant ola bilməz.
– Buzovna qəsəbə stadionunu təmir etdirdiyinizi bilirik. Komanda növbəti mövsüm orada oynaya biləcək, yoxsa yenə Binə qəsəbə stadionundan yararlanacaq?
– Dövlət-özəl tərəfdaşlıq layihəsi çərçivəsində biz Buzovnadakı stadionun infrastrukturunu tam olaraq dəyişdik. Ancaq PFL-in qarşımıza qoyduğu tələblər var. Biz maksimum çalışacağıq ki, I Liqadakı ev oyunlarımızı orada keçirək. Oradakı işlər demək olar ki, yekunlaşmaq üzrədir. Ancaq bizim öncədən bilmədiyimiz tələblər var. Maliyyə yetərli olsa, həmin tələbləri də yerinə yetirəcəyik.
– İncələsək, PFL-in o stadionla bağlı tələbləri hansılardır ki?
– Tablo, dopinq otağı, mətbuat konfransı otağı, soyunub-geyinmə otağı, sanitar qovşaqları ilə bağlı problemlər qalıb. Projektor da quraşdırılmayıb. Ancaq I Liqa üçün projektorun mütləq olması tələbi qoyulmayıb. Orada gündüz də oynamaq mümkündür.
– Bilirik ki, II Liqa yarımhəvəskar çempionatdır. I Liqaya vəsiqə qazanan klub tam peşəkar olmağa hazırdırmı?
– Bizim aşağı yaş qrupları üzrə komandalarımız artıq neçə ildir ki, fəaliyyət göstərir. Hətta qız komandalarımız da var. Biz rəhbərlik olaraq peşəkarlaşma yönündə hər şeyi etməyə hazırıq. Komanda kimi peşəkarlıq isə baş məşqçimizə aid olan məsələ olacaq. Komanda, futbolçuların transferi ilə bağlı bütün məsələlər onun səlahiyyətindədir.
Səbuhi Musa
