"Sumqayıt" Azərbaycan Premyer Liqasının XXXV turunda səfərdə "Sabah"a 0:2 hesabı ilə məğlub olub.
Prosport.Az xəbər verir ki, "kimyaçılar"ın baş məşqçisi Samir Abasov matçdan sonra keçirilən mətbuat konfransında jurnalistlərin suallarını cavablandırıb:
- "Qəbələ" ilə oyuna hazırlaşacağıq. Əlimizdən gələni etməyə çalışacağıq.
- Yenə "Sabah", yenə Murad Xaçayev səhv etdi. Sizcə, bu, təsadüfdür?
Neynəyək Xaçayevə? Əlbəttə təsadüfdür. Digərləri də səhv edir. Bir nəfərin üstünə düşmək düzgün olmaz. İnsandı da, robot deyil ki. Canı sağ olsun.
- Oyunçu keyfiyyəti baxımından "Sabah"dan geri qaldığınızı düşünürsünüz?
- Hər oyunçuya verilən pul göz qabağındadır. Bizdə inkişaf etməyə çalışan futbolçular var. Amma rəqibin oyunçuları bu cür ajiotajı görüblər. Əlbəttə, fərq olacaq. Bu gün keyfiyyətdə uduzduq. İkinci hissədə rəqibi üstələdik. Onlar əks-hücumda oynamağa başladılar. İlk yarıda biz bunu etməli idik. Əfsuslar olsun ki, hücumçularımız bunun öhdəsindən gələ bilmədilər. Hər şey normaldır. Futbolçularımı göstərdikləri əzmə görə təbrik edirəm.
- Yanvarda transferlərin olmaması bu gün özünü göstərir?
- Transferlə bağlı rəhbərlikdən soruşun. Mən artıq yoruldum. İndi transferdən danışmağı məqsədəuyğun saymıram. Komandanın avrokuboklar zonasında olması mənim, şəhərim üçün xoşdur. Heç nə itirilməyib. İtsə də, imkan vermərəm ki, kimsə futbolçularıma nəsə desin. Oyunun qırılma nöqtəsi Rövlanın zədələnməsi idi. Təlaşda olmalı deyilik.
- Abu Dossonun oyununu qiymətləndirərdiniz...
- Sıfır.
- Ardıcıl 4-cü dəfədir səfərdə "Sabah"ı məğlub edə bilmirsiniz. Bu, təsadüfdür?
- Bu gün bilirdim ki, nə qədər ajiotaj var. Bu, bizi Avropada da gözləyir. "Sabah"dan dala qalmadıq. Onların futbolçularına təəccüblənirəm. Bar-bar bağıran siz idiniz ki, rəqiblər vaxt aparır. Bu gün sizi yerdən yığışdırmaq olmurdu. Bilirəm deyəcəksiniz ki, əcəb edirdilər. Olsun.
- Hakimlik barədə düşüncələriniz necədir?
- Bizi uşaq yerinə qoymayın. Hakim nə etsin? O da nəyəsə uymalıdır. Üç oyunun ikisinə xaricdən VAR hakimi gəldi, birinə yerli hakim verdilər ki, Tovuz uzaqdır. Bizi niyə Tovuza göndərirsiniz bəs? "Sumqayıt"ı "dartırlar" və s. Bunun axırı var idi də. Biz bilirdik. Amma bu gün hakimə görə uduzmadıq. Hakim məsələsini atın kənara, hər şey bəllidir.