"Turan Tovuz" Azərbaycan Premyer Liqasının XXXIV  turunda səfərdə "Qarabağ"a 3:4 hesabı ilə məğlub olub.

Prosport.Az xəbər verir ki, qərb təmsilçisinin baş məşqçisi Ayxan Abbasov matçdan sonra keçirilən mətbuat konfransında jurnalistlərin suallarını cavablandırıb:

– Xal qazanmaq istəyirdik. Bilirdik ki, rəqib "Qarabağ"dır, çətin olacaq. İlk hissədə qol epizodlarını dəyərləndirə bilmədik. 2-ci hissəyə yaxşı başladıq, qollar vurduq. Məğlubiyyətə üzülürəm. Çox rahat qollar buraxdıq. Amma yaxşı qollar vurmuşuq. Ən çox qol vuran 2-ci komandayıq. Son 4 tura kimi avrokubok həyəcanı yaşadıq. Gələn mövsüm bunu sona qədər çatdırmaq lazımdır.

– Rəqibin 4-cü qolundan öncə qayda pozuntusu olduğu görünürdü. Siz necə düşünürsünüz?
– Məncə də, 100% qayda pozuntusudur. Hakimlikdən danışanda deyirlər ki, baş məşqçi bəhanə axtarır. Hakim dedi ki, VAR-da baxdıq, top Belaydi Pusinin əlinə dəyib. Bundan başqa da bir neçə epizod oldu. Bir tərəfdən xoşdur ki, "Qarabağ"la oyunlarda belə sərt mübarizələrə imkan verirlər. Amma son dəqiqədə belə qol buraxmaq çətindir. II dövrədə hakim səhvləri bizə çox təsir edib. Bu gün tam başqa şeylər ola bilərdi. Bunu  da keçməliyik.

– Sizcə, hakimliyin səviyyəsi budur, yoxsa hansısa komandalara kömək edirlər?
– "Komandalara işləyirlər" sözü ağır olar. Amma görünən odur ki, hakimlər bu il yükü daşıya bilmədi. Hamıya aid deyil, yaxşı hakimlərimiz də var. Amma nəticəyə təsir edən səhvlər çox oldu. Onlar da inkişaf etməlidir. Eşitdiyimə görə, çempionatda komanda sayının artmamasının səbəblərindən biri də hakimlərin az olmasıdır. Bu mövqedə də iş getməlidir.

– Komandadan neçə nəfər gedəcək?
– Çalışacağıq ki, 4-5 transfer edək. Gedənlərlə bağlı 100% qərar verməmişik. Son oyundan sonra fikirləşəcəyəm. Bir futbolçu var ki, bu gün yaxşı mənada fikrimi dəyişdi. Məşqçilikdə belə şeylər var.