Karate üzrə olimpiya mükafatçısı, üçqat dünya və ikiqat Avropa çempionu İrina Zaretskayanın Xorvatiyanın Zadar şəhərində keçirilmiş qitə çempionatını buraxmasının səbəbi bəlli olub.
Bu barədə Prosport.Az-a Azərbaycan Milli Karate Federasiyasının prezidenti Yaşar Bəşirov bildirib.
"İrina analıq məzuniyyətindədir, övladı dünyaya gələcək. Karate millimizdən 2025-ci ildə keçiriləcək dünya çempionatı və Dünya Oyunlarına vəsiqə qazanan hələ ki yeganə idmançımızdır. O, avqustdan hazırlıqlara başlayacaq".
Qeyd edək ki, kişi kumite millimizdə də dünya mükafatçısı, Avropa çempionu Tural Ağalarzadə (67 kq) və ikiqat dünya mükafatçısı, Avropa çempionu Asiman Qurbanlı (+84 kq) zədəli olduğu üçün mötəbər yarışa qatıla bilməyib. Nəticədə kişi kumite millimiz finalçı Yunanıstana 2:3 və bürünc medalçı Fransaya 0:3 uduzaraq həm mükafatsız qalıb, həm də bu il ilk dəfə İspaniyanın Pamplona şəhərində keçiriləcək komandalararası dünya çempionatına (22-24 noyabr) lisenziya qazana bilməyib.
Lider İrina Zaretskayasız (68 kq) qalmış qadın kumite millimiz isə 2-ci görüşündə bürünc medalçı Türkiyəyə 0:2 uduzaraq dünya çempionatında iştirak hüququnu itirib.
Yalnız kişi kata millimiz dünya çempionatında iştirak edə biləcək. Buna səbəb Rövşən Əliyev, İsmayıl Quliyev, Həsənəli Həsənov və Roman Heydərovdan ibarət millimizin ilk "5-liy"ə düşməsidir. Baş məşqçi Vahid Ayvazovsuz yarışa yollanmış komandamız Avropa çempionu Türkiyəyə uduzsa da, təsəlliverici yarışda Şimali Makedoniya və 3-cü yer uğrunda görüşdə Monteneqroya qalib gələrək bürünc medal qazanıb. Bu, kata millimizin tarixdə ən böyük uğurudur. Bunadək Roman Heydərov 4 dəfə Avropa çempionatının bürünc medalını qazansa da, ilk dəfə komanda şəklində də buna nail olub.
Yeri gəlmişkən, kişi kumite millimiz və debütant Hüseyn Məmmədlinin (67 kq) bürünc medalı sayəsində Azərbaycan yarışı 18-ci sırada bitirib. Müqayisə üçün bildirək ki, ötən il İspaniyanın Qvadalaxara şəhərində keçirilmiş Avropa çempionatını millimiz 9-cu sırada (2 gümüş, 2 bürünc medal) tamamlamışdı.
18 ölkənin iştirak etdiyi parakarate üzrə Avropa çempionatında daha uğurlu çıxış etmişik. Azərbaycan 1 qızıl və 3 gümüş medalla İtaliyadan (2-0-2) sonra 2-ci yeri tutub (ötən il də 1 qızıl, 2 gümüş və 1 bürünc medalla 2-ci olmuşduq). Belə ki, əlil arabasında olan kata parakarateçilərinin yarışında (K-30) I Qarabağ Müharibəsi qazisi Eldar Əhmədov ötən il finalda uduzmuşdusa, bu dəfə həlledici görüşdə II Qarabağ Müharibəsi qazisi Vidadi Xaliqovu məğlub edib. Görmə məhdudlu (K-10) kata parakarateçilərimizdən Nihat Məmmədzadə yenə gümüş medalla kifayətlənib. O, Noan Düdona (Fransa) finalda uduzub. Son dünya çempionumuz Emiliya Mitlinova ötən il Avropa çempionatının finalında məğlub etdiyi Benedetta Belottiyə (İtaliya) bu dəfə uduzmaqla gümüş medala razılaşmalı olub.
Səbuhi Musa