AFFA İntizam Komitəsi I Liqanın XXV turunda “İmişli” və “Qaradağ Lökbatan” oyununda baş verən hadisələrlə bağlı qərarlarını açıqlayıb.

Prosport.Az xəbər verir ki, meydan sahiblərinin 4 futbolçusu sarı vərəqə aldığına görə klub 70 manat cərimə edilib.

Matçın 42-ci dəqiqəsində meydançaya atılan kənar əşyanın hakimə dəyməsi nəticəsində oyunda 10 dəqiqə fasilə yarandığına görə “İmişli” əlavə 500 manat cərimələnib, kluba xəbərdarlıq olunub.

Meydançaya kənar şəxsin daxil olması İmişli təmsilçisini daha 80 manat ziyana salıb.

Qeyd edək ki, həmin oyunun ilk hissəsində "İmişli" qol vursa da, çimərlik futbolu üzrə FIFA referisi İnqilab Məmmədov topun ələ dəydiyini əsas gətirərək hesabın açılmadığını bildirib. Təkrara baxıldıqda isə onun səhvə yol verdiyi görünür.