"Qətər səfərinin apreldə yox, mayda baş tutması təşkilatçı "Aspire Academy" ilə bağlıdır. Qarşı tərəf bizdən bunu xahiş etdi. Çünki onların bir yaş qrupunun proqramında məcburi dəyişiklik oldu. Məlumat üçün bildirim ki, "Aspire Academy" hər hansısa bir klub deyil. Bu akademiya Qətər millisinin bazasını təşkil edir. Qətər klubları orada məşq keçir, beynəlxalq yarışlara bu akademiyanın xətti ilə yollanırlar. "Qəbələ" Futbol Akademiyasında işlədiyim vaxtda – 2016-cı ilin fevralında oraya U-10, U-11 və U-12 komandaları ilə səfərə yollanmışdıq. "Aspire Academy" və Fransanın "Mets" komandası ilə miniturnirdə çıxış etmişdik. O vaxtdan bu akademiya ilə əlaqələrim var. Ötən ilin avqustunda isə qətərlilər Qəbələyə gəlmişdi".
Bunu Prosport.Az-a "Qarabağ" Akademiyasının yeni meneceri Nail Kərimov deyib.
"Qarabağ"ın U-15 və U-17 komandaları 18-23 may tarixlərində Qətərin paytaxtı Dohada olacaq. Müvafiq olaraq Vüqar Əsgərli və Samir Musayevin baş məşqçisi olduğu komandalar orada "Aspire Academy" ilə 2 yoxlama oyunu keçirəcək. Bu yerdə xatırladaq ki, "Neftçi"nin U-11 və U-12 komandaları martda həmin akademiyada məşq keçərək təcrübələrini artırıb.
Nail Kərimovun sözlərinə görə, U-15 liqasındakı oyunların təxirə salınması üçün artıq AFFA-dan razılıq alınıb: "Səfərə yollanmazdan 2-3 gün əvvəl oyun keçirəcəyik. Daha sonra Azərbaycanda olmadığımız günlərdə olacaq matçlarımız təxirə salınacaq. Sağ olsun ki, AFFA bu məsələdə bizə kömək oldu".
Daha sonra o bildirib ki, 17-21 may tarixlərində "Qarabağ"ın 2 yaş qrupu Antalyadakı turnirdə iştirak edəcək: "Antalyada "Junior World Cup" beynəlxalq turnirində U-9 və U-14 komandalarımız iştirak edəcək. Hər iki yaş qrupunda normal rəqiblər var. Türkiyənin aparıcı klubları, Avropa, Asiyadan komandalar bu turnirdə mübarizə aparacaq".
Qeyd edək ki, Antalyadakı turnirdə "Olimpik" (Marsel), "Antalyaspor", "Borusiya" (Dortmund), "Qalatasaray", "Atletiko" (Madrid), "Milan", "Benfika", "Beşiktaş" kimi məşhur klubların aşağı yaş qrupu üzrə komandaları çıxış edəcək. Həmçinin, Belarus, Belçika, Çin, Xorvatiya, Çexiya, Danimarka, Estoniya, Finlandiya, Gürcüstan, Yunanıstan, Macarıstan, Hindistan, Qazaxıstan, Kosovo, Qırğızıstan, Latviya, Polşa, Rusiya, Slovakiya, Özbəkistan kimi ölkələrin klubları yarışacaq.
Səbuhi Musa