Ümumdünya Güləş Birliyi (UWW) Bakıda keçirilmiş Avropa Olimpiya Təsnifat Turnirinin Turan Bayramov (Azərbaycan) – Frank Çamiso (İtaliya) görüşü haqda yekun qərarını bu həftə açıqlayacaq.
Prosport.Az-ın xəbərinə görə, bu barədə Kuba əsilli idmançı öz sosial şəbəkə hesabında məlumat verib:
"Bakıda keçirilən sonuncu turnirdəki qalmaqallı döyüşə görə mənə dəstək olan bütün gözəl insanlara salam olsun. Çox adam məndən sözügedən görüşlə bağlı nə qərar verdikləri barədə məlumat istəyir. Sizə demək istəyirəm ki, onlar hələ qərar verə bilməyiblər və gələn həftəyə (bu həftə – red.) dəyişmək qərarına gəliblər. Mən də sizin hamınız kimi çarəsizəm. Dəstəyiniz üçün təşəkkür edirəm. Mən sizi xəbərdar edəcəm".
Qeyd edək ki, UWW sərbəst güləşdə 74 kq çəki dərəcəsində baş tutmuş bu görüşdə 10 gün əvvəl hakimlik qərarlarını, məşqçilərin verdiyi "çelenc"ləri araşdırmaq üçün 2 fərqli komissiya yaratdığını açıqlayıb. Bir komissiyada Hakimlər Komitəsinin sədri Antonio Silvestri (Almaniya) və 2 ekspert, digərində isə hakimlik və Beynəlxalq Güləş Qaydaları sahəsində təcrübəsi olan 3 Büro üzvü yer alıb. Bundan əlavə, UWW İntizam Palatasının sədri Belço Qoranov (Bolqarıstan) Frank Çamisonun səsləndirdiyi 300 min dollarlıq korrupsiya iddiasını araşdırmaq üçün 3 üzvdən ibarət komissiya yaradıb.
Səbuhi Musa