"Qarabağ"ın "Hədəf" qruplarından biri olan U-15 komandası növbəti böyük hesablı qələbəsini qazanıb.

Prosport.Az-ın xəbərinə görə, Vüqar Əsgərlinin baş məşqçisi olduğu "Qarabağ" XXVII turda öz meydanında ASTA (Azerbaijan Sports Talents Academy) komandası ilə qarşılaşıb.

Gözlənildiyi kimi, "köhlən atlar" rəqibini böyük hesabla darmadağın edib – 8:0. Bununla belə, qeyd etməliyik ki, Rafail Yusifovun baş məşqçisi olduğu ASTA 40 dəqiqədən ibarət olan ilk hissədə güclü "Qarabağ"a müqavimət göstərə bilib. Belə ki, bütün qollar yalnız fasilədən sonra vurulub. Ağdam komandasının bombardiri Əli Bəşirov 61, 74 və 80-ci dəqiqələrdə het-trik edib. Polad Hüseynov (45), Onur Əliyev (48), Riad Qaradağlı (66), Uğur Qurbanlı (68) və Hüseyn Bayramov (73) hərəyə 1 qol vurub.

Qeyd edək ki, ilk dövrədə "Qarabağ" Buzovna stadionunda bu rəqibini 9:2 hesabı ilə məğlub etmişdi.

69 xalla lider olan "Qarabağ" növbəti turda – aprelin 20-də Binə stadionunda "Lion"un qonağı olacaq.