Son günlər İtaliyanın Kuba əsilli sərbəst güləşçisi Frank Çamisonun Azərbaycan idmançısı Turan Bayramovla görüş zamanı ədalətsizliklə üzləşməsi ətrafında fikirlər gündəmi zəbt edib.

İtaliya Cüdo, Güləş, Karate və MMA Federasiyası (FIJLKAM) Ümumdünya Güləş Birliyinə (UWW) rəsmi şikayət edib. Bəs UWW hakim səhvini təsdiqləyəcəyi halda, hansı qərarlar qəbul edilə bilər?

Prosport.Az bu barədə məlumat əldə edib. Əvvəla, onu bildirək ki, istənilən qərardan asılı olmayaraq, bu, 74 kq çəki dərəcəsində Turan Bayramovun Paris Olimpiadasında çıxışına heç bir halda əngəl yaratmayacaq. Çünki idmançımızın Olimpiadada çıxışı rəsmiləşib. Burada hakim səhvi olsa da, olmasa da.

Qərara əsasən Frank Çamisoya yaşıl işıq yandırıla bilər. Belə ki, hakim səhvi sübuta yetirilərsə, o zaman İtaliya güləşçisinin Olimpidaya lisenziya qazandığı açıqlanacaq və Çamiso İstanbuldakı Dünya Olimpiya Təsnifat Turnirinə gedəsi olmayacaq.

Qeyd edək ki, ötən il 2 dəfə buna bənzər hal yaşanıb. Serbiyanın paytaxtı Belqradda keçirilmiş dünya çempionatında yunan-Roma güləşində 87 kq çəki dərəcəsində türkiyəli Ali Cengizə qızıl medal verilsə də, sonradan orada ciddi hakim səhvinin olduğu, macar David Loşonçinin rəqibinin kürəyini xalçaya sıxdığı müəyyənləşmişdi. Bu səbəbdən UWW Loşonçiyə də qızıl medal təqdim etmişdi.

Həmçinin, ötən il Albaniyanın paytaxtı Tiranada keçirilən U-17-lərin dünya çempionatında Turan Daşdəmirov rusiyalı Rüstəm Abatsiyevə qalib gəlsə də (4:4), hakim səhvinin olduğu aşkarlanmışdı. Bu səbəbdən sonradan Abatsiyevə də qızıl medal verilmişdi.

Səbuhi Musa