"Zirə" Azərbaycan Premyer Liqasının XXX turunda səfərdə "Sumqayıt"la 0:0 hesablı heç-heçə edib.
Sportnet.az xəbər verir ki, "qartallar"ın baş məşqçisi Rəşad Sadıqov matçdan sonra keçirilən mətbuat konfransında jurnalistlərin suallarını cavablandırıb:
- Olduqca gərgin və stressli oyun idi. Hər iki komanda məğlub olmaq istəmirdi. Hamı bilirdi ki, burada qazanılan qələbə və ya məğlubiyyət kimi qabağa çəkə, ya da geri sala bilər. "Sumqayıt" çox yaxşı formadadır. Futbolçularıma apardıqları mübarizəyə görə təşəkkür edirəm. Hər iki komanda son saniyələrə qədər qələbə qazanmaq istəyirdi. Oyunun ədalətli nəticəsi bərabərlik idi. Meydanda müasir futbol gedirdi. Belə oyunlar çempionatımızın keyfiyyətini artıracaq. Buna əminəm. Qarşıdan biri-birindən maraqlı oyunlar gəlir. Hər biri çox önəmlidir. Getdikcə gərginlik artır. Bu, futbolçularda da, azarkeşlərdə də hiss olunur. Əlimizdən gələni edəcəyik ki, sonda sevinən tərəf biz olaq.
- 1 xal qazandınız, yoxsa 2 xal itirdiniz?
- "Sumqayıt" əsas rəqiblərimizdən biridir. Bu heç-heçə şəxsi oyunlarda da bizə üstünlük verdi. Aramızdakı 2 xallıq fərqi qoruya bildik. Ən azı 1 heç-heçə limitimiz var. 2 xal itirdiyimizi desəm, ədalətsizlik olar. Düşünürəm ki, bu gün səfərdə 1 xal qazandıq.
- Hədəfiniz 2-ci yerdir, yoxsa avrokuboklara vəsiqə qazanmaq?
- Hədəfimiz Konfrans Liqasına vəsiqə qazanmaqdır. Əgər medallar uğrunda mübarizə aparmaq imkanı varsa, niyə də olmasın?! Hər komanda bunu istəyir. Bizim də şansımız var. Sona qədər mübarizə aparacağıq.
- Son günlərdə adınız "Neftçi" ilə hallanır. Təklif gəlsə, qəbul edəcəksiniz?
- Ağ və qara mənim sevimli rənglərimdəndir. Bunu hamı bilir. Geyimlərimdə də bu rənglərə üstünlük verirəm. Hər məşqçi istəyər ki, "Neftçi"də, "Qarabağ"da, milli komandada çalışsın. Əminəm ki, bütün gənc məşqçilərin belə hədəfi var. Karyeramın yarısı "Neftçi"də keçib. Böyük futbolda ilk addımlarımı orada atmışam. Daha sonra karyeramın vacib hissəsini "Qarabağ"da keçirmişəm. 17 il isə millidə oynamışam. Bu üç komandanın hər biri mənim üçün dəyərlidir. İnanıram ki, hər iki klubun azarkeşləri məni anlayışla qarşılayar. Sabah "Qarabağ"da da, "Neftçi"də də məşqçi ola bilərəm. Bəlkə heç birində məşqçi olmayacam. Ümumən istəyim ölkə xaricində məşqçilik etməkdir. Sabah nə baş verəcəyini bilmirəm. Mənə heç bir təklif olmayıb. Bütün fikrimi "Zirə"yə yönəltmişəm. Çempionat gərgin keçir. "Neftçi" rəhbərliyi də belə periodda heç bir məşqçiyə təklif göndərməz. Bu, şayiədir. Aramızda heç bir söhbət yoxdur. Futbolçu vaxtı həmişə böyük komandalarda oynamağa tələsirdim. Məşqçi kimi fərqlidir. Məşqçi üçün yetişməyə zaman lazımdır. Mənim "filan komandanın baş məşqçisiyəm" kimi dərdim yoxdur. Əgər xeyir verə biləcəmsə, o təklifi qəbul edərəm. Xeyir verməyəcəmsə, işləməyəcəm. Sabah görsəm ki, "Zirə"yə xeyir vermirəm, gedəcəm. Bu gün gecəmi-gündüzümü işimə həsr edirəm. Şəxsi həyatım o qədər də önəmli deyil. Qarşıda vacib oyunlar var. İki illik müqavilə bağlamışam. Amma rəhbərliklə söhbətim olub ki, mövsümün sonunda təhlil edək. Əgər həqiqətən də komandaya xeyrim varsa, yola davam edəcəyik. Mən vəzifə xəstəsi deyiləm.