"Bakıda uduzmağım üçün mənə 300 min dollar pul təklif edildi. İtaliyanı təmsil etdiyim üçün "yox" dedim. Daha sonra hakim azərbaycanlı güləşçi ilə matçın qərarını dəyişdi. Hələ də Paris Olimpiadasına gedə bilərəm. Amma Türkiyədəki lisenziya turnirində də mənə qarşı haqsızlığa yenidən cəhd etsələr, ortalığı qarışdıraram”.
Prosport.Az xəbər verir ki, bunu İtaliyanın sərbəst güləş üzrə olimpiya mükafatçısı, ikiqat dünya və dördqat Avropa çempionu Frank Çamiso "Republika" qəzetinə müsahibəsində deyib.
O, Bakıda keçirilən Avropa Olimpiya Təsnifat Turnirində lisenziya qazanmağın bir addımlığında – yarımfinalda Turan Bayramovla görüşdə hakimlərin ona qarşı qərəzli olduğunu iddia edir: "Hələ də şokdayam. Baş verənlərə görə kədərliyəm, incidilmişəm".
74 kq çəki dərəcəsində çıxış edən güləşçi son saniyələrdə 2 xalının əlindən alındığını bildirir: "Döşəmə kənarında olan 5 hakim eyni qərarı qəbul edərək, rəqibin sağ dizini yerə yıxdığımı, ona görə də qalib gəldiyimi bildirdilər. Sonra onlar vaxt bitdikdən sonra bunu etdiyimi icad etdilər. Xalçadakı hakim isə videotəkrarda tək kameradan olan görüntülərə baxdı və digər 5 hakimə zidd qərar verdi. Hətta görüşün şərhçiləri "Bunu etmə, bunu etmə" deyə bildirirdi. Bəlkə də onlar bunun arxasında nə olduğunu bildikləri üçün belə qışqırırdılar. Amma sonda onlar inanılmaz olanı etdilər".
31 yaşlı idmançı daha sonra ona rüşvət təklif edildiyini qeyd edib: "Azərbaycanda qalib gəlmək üçün ikiqat, üçqat əziyyət çəkməli olduğumu bilirdim. Çünki onların evində güləşirdim və onlar hər şeyi almışdı. Eyni hakim (rusiyalı Aleksey Bazulini nəzərdə tutur – red.) bütün turnirdə azərbaycanlıların yanında idi. İllər əvvəl boks yarışında da bunu xatırladan bir şey olmuşdu. Mənə 300 min dollar pul təklif etdilər. Bunun kim tərəfindən olduğunu demək istəmirəm. Amma bu çəki ölçmənin səhəri baş verdi. Mən bundan imtina etdim... Çünki mən təkcə özümü deyil, həm də İtaliyanı, federasiyamı və Ordunu təmsil edirəm. Dürüstlüyümü pozmaq asan deyil. Bunun üçün sübut? Mən canlıyam. Sübut odur ki, mən baş verənlərdən əziyyət çəkirəm, sadəcə matça baxın. O qədər iyrənirəm ki, idmandan danışdığımı hiss etmirəm".
Qeyd edək ki, həmin yarışda Turan Bayramov Frank Çamiso ilə 8:8 heç-heçə etsə, xalların keyfiyyətinə görə Olimpiadaya lisenziya alan tərəf olub.
