"Lisenziya turnirinin yarımfinalında məğlub etdiyim İslam Dudayev bu il Avropa çempionu olmuşdu. O, yaxşı idmançıdır. Əminəm ki, o, İstanbulda Olimpiadaya lisenziyanı qazanacaq".

Prosport.Az-ın xəbərinə görə, bunu sərbəst güləş üzrə ikiqat olimpiya mükafatçısı, üçqat dünya və dördqat Avropa çempionu Hacı Əliyev deyib.

Bu ay 33 yaşını qeyd edəcək idmançı Bakıda keçirilən Avropa Olimpiya Təsnifat Turnirində Paris Olimpiadasına lisenziya qazanıb. O, Fransanın paytaxtında əsas rəqiblərinin kimlər olduğunu bildirib: "İlk dəfə 2014-cü ildə Avropa çempionu olmuşam. O vaxtdan bəri hər il nəticə verə-verə bu yerə kimi gəlmişəm. Məşq etməsəm, mənə qalib gələrlər. Olimpiada mənim son yarışımdır. Ona görə də qızıl medalla başa vurmaq istəyirəm. Olimpiadada güclü rəqiblərim çoxdur. 65 kq-da rəqabət var. Rusiyalı (Şamil Məmmədov), kubalı (Sebastyan Rivera), iranlı (Rəhman Əmuzad) rəqiblərim var. Son dünya çempionu İsmail Musukayev (Macarıstan) da əsas rəqiblərdəndir. Hamısı güclü idmançılardır, özlərinə görə texnika və taktikaları var. Yaxşı hazırlaşsam, hamısına qalib gələ bilərəm".

Hacı finalda qarşılaşmalı olduğu rəqibin adını da çəkib: "Finalda iranlı idmançı ilə görüşmək istərdim. Çünki o mənə qalib gəlib. Əlbəttə, bu, idmandır, güləşdir. Kimsə qalib gəlməlidir. Ancaq ondan revanş almaq istərdim".

Qeyd edək ki, Hacı Əliyev 2022-ci ildə Serbiyanın paytaxtı Belqradda keçirilən dünya çempionatının yarımfinalında Rəhman Əmuzada 2:9 hesabı ilə uduzub. İranlı güləşçi həmin yarışda yeganə dünya çempionluğunu qazanıb.