"Mənim baş məşqçiliyim dövrümdə 5 lisenziya qazandığımız üçün çox şadam".

Prosport.Az xəbər verir ki, bunu sərbəst güləş üzrə Azərbaycan millisinin baş məşqçisi Xetaq Qazyumov Bakıda keçirilən Avropa Olimpiya Təsnifat Turnirindəki nəticələr barədə jurnalistlərə açıqlamasında deyib.

Mütəxəssis yarışa qatılan 5 idmançının hər birinin Olimpiadaya lisenziya əldə etməsindən məmnun olduğunu söyləyib: “Federasiya prezidentinin və azarkeşlərin etimadını doğrultduq. Heyətə kimləri qoyduqsa, uğurlu nəticə qazandı, bizi yanıltmadı. Bu da gələcəkdə gənclərimiz üçün üstünlükdür”.

Baş məşqçi 3 gündən sonra Qubada təlim-məşq toplanışına başlayacaqlarını sözlərinə əlavə edib: "Hazırlığa U-23 yığması da qoşulacaq. Birlikdə məşq edəcəyik”.

Qeyd edək ki, Bakıda keçirilən yarışda Azərbaycan millisinin heyətində Əliabbas Rzazadə (57 kq), Hacı Əliyev (65 kq), Turan Bayramov (74 kq), Osman Nurməhəmmədov (86) və Georgi Meşvildişvili (125 kq) Paris-2024 Yay Olimpiya Oyunlarına lisenziya əldə edib.