Bakıda keçirilən güləş üzrə Avropa Olimpiya Təsnifat Turnirində 5 idmançımız Paris Olimpiadasına lisenziya qazanıb. Əliabbas Rzazadə (57 kq), Hacı Əliyev (65 kq), Turan Bayramov (74 kq), Osman Nurməhəmmədov (86 kq) və Georgi Meşvildişvili (125 kq) uğura imza atıb.
Prosport.Az onların fikirlərini təqdim edir:
Əliabbas Rzazadə: "Bütün azarkeşlərə – istər tribuna qarşısında olan, istərsə də televiziyadan izləyənlərə öz minnətdarlığımı bildirirəm. Doğma divarlar arasında güləşmək həqiqətən də ayrı hissdir, böyük motivasiya verir. Yarışa güclü hazırlaşmışdıq. Sağ olsun, məşqçilərimiz Cəbrayıl Həsənov və Xetaq Qazyumov. Qarşıma məqsəd qoydum. Allaha şükürlər olsun ki, Olimpiya Oyunlarına lisenziyanı təmin etdim. Qarşıda məni daha çətin sınaq gözləyir. İnanıram ki, belə güləşib Paris Olimpiadasında da qələbəmin davamını gətirəcəyəm. Olimpiadada əsas rəqibim Rusiyadan olan güləşçi (kumık Zaur Uquyevi nəzərdə tutur – red.) olacaq. Məqsədim ona da qalib gəlib olimpiya qızılıdır".
Hacı Əliyev: "İlk növbədə sevinirəm ki, bu qədər azarkeşin önündə məğlub olmadım, onları sevindirdim. Artıq 3-cü dəfədir ki, Olimpiya Oyunlarına vəsiqə qazanıram. Uzun müddət çıxış etməyimə baxmayaraq, bu yarış karyeramda ən vacibi idi. Olimpiadalarda 1 dəfə 3-cü, 1 dəfə də 2-ci olmuşam. İnşallah, Parisdə qızıl medal qazanaram. Dizlərim neçə vaxtdır ki, zədəlidir. Demək olar ki, 2 aya yaxın məşq keçməmişəm. Əsas odur ki, əlim qalxdı. Ən vacibi budur".
Turan Bayramov: "Bu yarışa ciddi hazırlaşmışdım. Bu yarış Azərbaycanda keçirildiyi üçün ikiqat ruhda köklənmişdim. Dünya çempionatında sona 3 saniyə qalmış lisenziyanı əldən verdim. Yarımfinalda qarşılaşdığım İtaliya təmsilçisi olan rəqibim çox güclü güləşçidir. Ona London Olimpiadasının yarımfinalında gəncəli Toğrul Əsgərov qalib gəlmişdi. Frank Çamisonu ancaq gəncəlilər məğlub edə bilərdi".
Osman Nurməhəmmədov: "Azərbaycan, Bakı mənim 2-ci vətənimdir. 7-8 ildir ki, burada yaşayıram. Bura məni mənəvi böyük qardaşım, millinin məşqçisi Şərif Şərifov gətirib. Məşqçilər heyətinə minnətnətdarlığımı bildirirəm. Qarşıdakı hədəf Olimpiya Oyunlarıdır. Komanda göstərdi ki, yaxşı formadadır. Bu cür davamlı dəstək olacaqsa, Parisdə 1 deyil, bir neçə qızıl medal qazana bilərik. Yunan-Roma və qadın güləşçilərimiz üzülməsin. Onların bəxti gətirmədi. İnanıram ki, gələn ay İstanbulda keçiriləcək Dünya Olimpiya Təsnifat Turnirində onlar uğurlu olacaq. Biz daim bir-birimizə dəstək veririk, hoteldə bir-birimizə məsləhətlər veririk, yaxşı və dar gündə bir yerdəyik. Təbii ki, Olimpiadada əsas rəqibim amerikalı Deyvid Teylor olacaq. Ancaq məğlubedilməz rəqib yoxdur".
Georgi Meşvildişvili: “Komanda, federasiya, məşqçi korpusu qarşısında məsuliyyətim var idi. Qələbə üçün əlimdən gələni etdim. Uğuruma görə bütün məşqçi heyətinə təşəkkürümü bildirirəm. Federasiya da bizim üçün hər cür şəraiti yaratmışdı. Xüsusən də, azarkeşləri vurğulamalıyam. Onlarsız mümkün olmazdı. Olimpiadada bütün rəqiblər yaxşıdır. Yarışa yüksək səviyyədə hazırlaşmaq lazımdır. Bütün idmançıların əsas arzusu olimpiya qızılını qazanmaqdır. Hamı bunun uğrunda döyüşəcək”.