Daha 2 sərbəst güləşçimiz Olimpiadaya lisenziya qazanıb.

Prosport.Az-ın xəbərinə görə, 86 kq çəki dərəcəsində Osman Nurməmmədov Vasili Mixaylova (Ukrayna) 4:1 qalib gəlib.

125 kq çəki dərəcəsində çıxış edən Georgi Meşvildişvili isə osetin əsilli Alen Xubulovu (Bolqarıstan) 7:0 məğlub edərək Olimpiadaya lisenziya qazanıb.

Beləliklə, Azərbaycan Paris Olimpiadasına sərbəst güləş üzrə maksimum - 6 lisenziya qazanıb. Daha əvvəl Məhəmmədxan Məhəmmədov (97 kq) Olimpiadaya lisenziya əldə etmişdi.

19:25

Azərbaycanın daha bir sərbəst güləşçisi Turan Bayramov Paris-2024 Yay Olimpiya Oyunlarında iştirak hüququ əldə edib.

Prosport.Az xəbər verir ki, 74 kq çəki dərəcəsində çıxış edən idmançı Bakıda keçirilən Avropa Olimpiya Təsnifat Turnirində bunu reallaşdırıb.

23 yaşlı pəhləvan yarımfinalda olimpiya mükafatçısı, ikiqat dünya və dördqat Avropa çempionu olan İtaliya təmsilçisi Frank Çamisonu üstələyib. Görüş 8:8 hesabı ilə yekunlaşıb. Xalların keyfiyyətinə görə, Turan Bayramov qalib elan olunub. Qələbə "çelenc"ə baxıldıqdan sonra idmançımıza verilib.

Qeyd edək ki, bu gün Əliabbas Rzazadə (57 kq) və Hacı Əliyev (65 kq) də Olimpiadaya lisenziya qazanıb.

18:51

.Sərbəst güləş üzrə Azərbaycan millisinin lideri Hacı Əliyev (65 kq) ardıcıl 3-cü dəfə Paris-2024 Yay Olimpiya Oyunlarına lisenziya qazanıb.

Prosport.Az xəbər verir ki, İkiqat olimpiya, üçqat dünya və dördqat Avropa çempionu Bakıda keçirilən Avropa Olimpiya Təsnifat Turnirində bunu bacarıb.

32 yaşlı idmançı yarımfinalda çeçen əsilli Albaniya təmsilçisi İslam Dudayevə 6:3 hesabı ilə qalib gəlib.

Qeyd edək ki, Hacı Əliyev Rio-2016-da bürünc, Tokio-2020-də gümüş medala yiyələnib.

18:10

Azərbaycanın sərbəst güləşçisi Əliabbas Rzazadə (57 kq) Paris-2024 Yay Olimpiya Oyunlarına lisenziya qazanıb.

Prosport.Az xəbər verir ki, 26 yaşlı idmançı Bakıda keçirilən Avropa Olimpiya Təsnifat Turnirində bunu bacarıb.

26 yaşlı Avropa çempionumuz Şimali Makedoniya təmsilçisi Vladimir Yeqorovdan güclü olub. Qitə çempionlarının duelindən Əliabbas Rzazadə 4:3 hesablı qələbə ilə ayrılıb.

Bununla Azərbaycanın Paris-2024-ə lisenziya qazanan idmançılarının sayı 12-yə yüksəlib. Daha əvvəl sərbəst güləşçi Məhəmmədxan Məhəmmədov (97 kq) Olimpiadaya lisenziya əldə etmişdi.

17:20

Azərbaycanın 5 sərbəst güləşçisi bu gün Olimpiadaya lisenziya qazana bilər.

Prosport.Az xəbər verir ki, Bakıda keçirilən Avropa Olimpiya Təsnifat Turnirində Əliabbas Rzazadə (57 kq), Hacı Əliyev (65 kq), Turan Bayramov (74 kq), Osman Nurməhəmmədov (86 kq) və Georgi Meşvildişvili (125 kq) yarımfinala adlayıb.

Saat 18:00-dan etibarən başlayacaq yarışda idmançılarımızın rəqibləri müvafiq olaraq Vladimir Yeqorov (Şimali Makedoniya), İslam Dudayev (Albaniya), Frank Çamiso (İtaliya), Vasili Mixaylov (Ukrayna) və Alen Xubulov (Bolqarıstan) olacaq.