Mayın 28-də 60 yaşını tamamladığı üçün Daxili İşlər Nazirliyindən (DİN) təqaüdə göndərilən stend atıcılığı üzrə Olimpiya, ikiqat dünya və üçqat Avropa çempionu Zemfira Meftəhəddinovanın yerinə təyinat baş tutub.

Prosport.Az-ın məlumatına görə, bu barədə daxili işlər naziri general-polkovnik Vilayət Eyvazov müvafiq əmr imzalayıb.

Əmrə əsasən, cüdo üzrə Pekin-2008 Yay Olimpiya Oyunlarının və 2003-cü ildə Yaponiyanın Osaka şəhərində keçirilmiş dünya çempionatının bürünc mükafatçısı olmuş polis polkovnik-leytenantı Mövlud Mirəliyev DİN-in İdman Cəmiyyətinin rəisi təyin edilib.

O bu təyinata qədər 2020-ci ilin iyulundən etibarən DİN-in İdman Cəmiyyətinin Regional Qurumunun baş inspektoru vəzifəsində xidmət edib. 49 yaşlı Mövlud Mirəliyev həmçinin hazırda Göygöl Olimpiya İdman Kompleksinin direktoru vəzifəsində çalışır.

Qeyd edək ki, Zemfira Meftahətdinova hazırda Milli Olimpiya Komitəsinin və Azərbaycan Atıcılıq Federasiyasının vitse-prezidentidir.

Səbuhi Musa