"Futbola gəldiyim üçün peşmanlıq keçirmirəm".

Prosport.Az xəbər verir ki, bunu AFFA-nın sabiq prezidenti Rövnəq Abdullayev milli assosiasiyanın Hesabat-Seçki Konfransında deyib.

O, 20 ildir ki, futbol camiəsində olduğunu xatırladıb: "Pyunik" üzərində qələbəni yaxşı xatırlayıram. 2006-cı ildə isə Ermənistan çempionu bizimlə oynamaqdan qaçdı. Bunlar sevindirici məqamlardır. Təbii ki, kədərli anlar da olub. Hər bir sevindirici anlar boş yerə çalışmadığını göstərir. Futbola dəstəyinə görə ən böyük pay cənab Prezident İlham Əliyevindir. Onun diqqəti sayəsində klublarımız sabit çıxış edir, heç bir maliyyə problemi yaşamırlar. Sponsorlar tapmağa çalışırıq. Ancaq sponsorsuz klub belə Premyer Liqada uğurlu çıxış edə bilir. Çempionat elə güclü səviyyədə keçir ki, artıq millimiz də yaxşı çıxış edəcək".

Rövnəq Abdullayev FIFA və UEFA rəhbərlərinə də təşəkkürünü bildirib: "Canni İnfantinoya və Aleksander Çeferinə təşəkkürümü bildirirəm. Onlar daim Azərbaycan futbolunun inkişafı üçün dəstəklərini verib. Onların bundan sonra da Azərbaycan futboluna dəstəklərini əsirgəməyəcəklərinə inanıram".

O sonda AFFA kollektivinə təşəkkürünü bildirib: "Haqqınızı halal edin, hər şeyə görə çox sağ olun. Artıq futbolda hansısa kluba azarkeşlik edə bilərəm. AFFA prezidenti olanda ancaq milliyə azarkeşlik etmək olurdu. Necə deyərlər: Kral öldü, yaşasın yeni kral (gülür). Başlayaq seçkiyə".