Azərbaycan Premyer Liqasının XXVIII turunun "Sabah" – "Zirə" oyunundan (0:1) sonra meydan sahibi komandanın baş məşqçisi Krunoslav Renduliç jurnalistlərin suallarını cavablandırıb.

Prosport.Az xəbər verir ki, mütəxəssis əvvəlcə görüşlə bağlı fikirlərini bildirib.

– Belə oyundan sonra nəsə demək çətindir. Futbolçularımın mübarizəsinə görə onlara təşəkkür edirəm. Oyuna nəzarət bizdə idi. Rəqibin yaxşı komanda olduğunu bilirdik. Kiçik səhv etdik və məğlub olduq. Futbolda belə hallar olur. Oyunu dəyişməyə çalışdıq, ancaq alınmadı. "Zirə"ni də qələbə münasibətilə təbrik edirəm. 1 qol vurdular və qalib gəldilər. Deməli, qələbəyə layiq idilər.

– "Zirə" sizdən önə keçdi. Fərdi oyunlarda da sizi üstələyir. Xallar eyni olsa, onlar avrokuboklara gedəcək...
– Hələ heç nə həll olunmayıb. Qarşıda 8 oyun oyun var. Hər şey dəyişə bilər. 2-ci sırada da ola bilərik, 4-cüdə də. 5-6 komanda bir-birinə yaxındır.

– Əsas rəqiblərinizdən birinə məğlub oldunuz. Ancaq təlaşınız yoxdur. Bu, komandanıza inamınızdan irəli gəlir?
– 1 oyun nəyisə dəyişməz. Bura gələndə də inam var idi ki, 2-ci olacağıq. Gəlişimdən sonra 3 oyun keçirmişik. Bu gün ən yaxşı matçımızı oynadıq. Lakin məğlub olduq.

– Ötən oyundan sonra demişdiniz ki, bütün gücünü qoymayan futbolçular komandanı tərk edəcək. Hansısa oyunçuda daha çox çalışqanlıq görürsünüz?
– Uşaqların mübarizəsindən, döyüşməklərindən razıyam. Futbol belədir, bəzən yaxşı oynasan da, qələbə qazana bilmirsən.