Azərbaycanın 2 boksçusu Bakıda kişi və qadınlar arasında keçirilən “Böyük İpək Yolu” beynəlxalq turnirində bürünc medal qazanıb.

Prosport.Az xəbər verir ki, 11 ölkənin 121 idmançısının qatıldığı yarışın 3-cü günündə Azərbaycan millisinin daha 5 üzvü mərhələ adlayıb.

67 kq-da İlqar Salahov 1/4 finalda pakistanlı Muhammad Usama ilə döyüşüb. O, 2-ci raundda tam üstünlüklə qələbə qazanıb və yarımfinala yüksəlməklə yanaşı, özü üçün azı bürünc medalı təmin edib. Salahov finala gedən yolda Mehdi Amirizafarla (İran) üz-üzə gələcək.

75 kq çəkidə 2 döyüşdə Azərbaycan dueli baş tutub. Kamran Şahsuvarlı Novruzəli Xuduyevə (30:27, 30:27, 29:28, 30:27, 30:27), Mirşərif Kazımzadə Fərhad Şeydayevə (30:27, 30:27, 30:25, 29:28, 30:27) 5:0 hesabı ilə qalib gələrək, yarımfinala vəsiqə qazanıb.

Özləri üçün bürünc medalı təmin edən boksçularımız növbəti qarşılaşmada müvafiq olaraq Səidcəmşid Cəfərov və Cəvahir Ümmətəliyevlə (hər ikisi Özbəkistan) qüvvəsini sınayacaq.

Paris-2024 Yay Olimpiya Oyunlarına lisenziyanın sahibi Murad Allahverdiyev isə finala yüksəlib. 86 kq-da rinqə çıxan boksçumuz Bekzat Tanqatardan (Qazaxıstan) güclü olub – 4:1 (27:30, 30:27, 30:27, 29:28, 29:28). O, həlledici görüşdə Xasməhəmməd Cavadxanovla (Rusiya) münasibətinə aydınlıq gətirəcək.

92 kq çəkidə Alfonso Dominqes də yarımfinal döyüşündən qələbə ilə ayrılıb. Dünya çempionu özbəkistanlı Diyarbəy Uralova 5:0 (30:27, 30:27, 30:27, 30:27, 29:28) qalib gəlib. Dominqes qızıl medal uğrunda döyüşdə Toqambay Sadindiklə (Qazaxıstan) qarşılaşacaq.

Sərxan Budaqovla (80 kq) Məhəmməd Abdullayev (+92 kq) isə turniri bürünc medalla bitirib. 1-ci Fazliddin Erkinboyevə (Özbəkistan) məğlub olubsa, Abdullayev 1/4 finalda zədələndiyi üçün Cahangir Zakirovla (Özbəkistan) döyüşə çıxmayıb.

Qeyd edək ki, Boks Mərkəzində keçirilən yarışın 4-cü gününün döyüşləri saat 14:00-da başlayacaq. Turnirdə final görüşləri sabah reallaşacaq.