"Qarabağ"ın 15 yaşadək komandası AFFA U-15 Liqasında tarixi nəticəyə imza atıb.

Prosport.Az-ın xəbərinə görə, futbolçuların imtahanına görə təxirə salınmış XXIV turda "Qarabağ" "Azərsun"a məxsus özəl futbol məktəbinin stadionunda autsayder olan Mingəçevirin "Ulduz" komandası ilə qarşılaşıb.

Baş hakim Elvin Bayramovun idarə etdiyi görüşdə cari mövsümkü çempionatın rekord nəticəsi qeydə alınıb. Vüqar Əsgərlinin baş məşqçisi olduğu komanda rəqibini 19:0 hesabı ilə darmadağın edib. İlk hissədə "köhlən atlar" baş məşqçisiz Bakıya gəlmiş rəqibinə 12 qol vurub.

Komandanın pleymeykeri Əli Bəşirov (1, 14, 15, 28, 40) pokerə, Hüseyn Bayramov (7, 19), Onur Əliyev (26, 37), Murad İbrahimli (30, 33), Kəmaləddin Cəfərli (49, 73) və Riad Qaradağlı (60, 67) dubla imza atıb. Kapitan Uğur Qurbanlı (23), Amin Rzayev (46), Murad Quluzadə (48) və Adəm Qafarov (61) isə hərəyə 1 qol vurub.

Bu nəticə ilə "Qarabağ" cari mövsüm çempionatda rekord nəticəyə imza atıb. Bunadək U-15 Liqasında ən böyük nəticə ötən tur Saatlı Olimpiya İdman Kompleksində qeydə alınmışdı. Belə ki, martın 9-da çempionatın lideri "Sabah" səfərdə Saatlı "Araz"ını 16:0 hesabı ilə darmadağın etmişdi.

Qeyd edək ki, "Qarabağ" oktyabrın 28-də keçirilmiş ilk matçda "Ulduz"u Mingəçevirdə 14:1 hesabı ilə darmadağın etmişdi. Ağdam təmsilçisi hazırda 63 xalla 1-ci sırada qərarlaşıb. 1 oyun az keçirən "Sabah"ın 61 xalı var. "Köhlən atlar" 30 mart – 1 aprel tarixlərində keçiriləcək növbəti turda istirahət edəcək.