"Oyunçularımı təbrik etmək istəyirəm. İlk yarıda yaxşı oynadılar. Oyuna nəzarət bizim tərəfimizdəydi. Rəqibi də təbrik edirəm. Bilirdik ki, yaxşı komandadır, turnir cədvəlində də bizdən yuxarıda idilər. Bura xallarımızı götürməyə gəlmişdik. İkinci hissənin son 30 dəqiqəsində fiziki cəhətdən bir az düşdük. Bəzi oyunçularımız xəstə, zədəli idi. Futbolçularımdan razı qaldım. Rəqib bizi sıxanda bundan rahatlıqla çıxırdıq. Şadam ki, gənc oyunçumuz Rauf meydana daxil olub, yaxşı performans sərgilədi".
Prosport.Az xəbər verir ki, bu sözləri "Sabah"ın baş məşqçisi Krunoslav Renduliç Premyer Liqanın XXVII turunun "Sumqayıt"la matçından (2:1) sonra keçirilmiş mətbuat konfransında deyib.
O, daha sonra jurnalistlərin suallarını cavablandırıb.
- "Qarabağ"dan savayı, digər komandalar ikincilik uğrunda mübarizə aparır. Bu yolda ən əsas rəqibinizi məğlub etdiniz. Ümumiyyətlə, avrokuboklar üçün heyəti beyninizdə qurmusunuz? Əsas məqsəd nədən ibarətdir?
- İkinci və səkkizinci yer arasında 2-3 xallıq fərq var. Bura gələndə də demişdim ki, məqsədimiz ikincilik uğrunda mübarizə aparmaqdır. Çətin olacaq. "Neftçi" və "Sumqayıt" kimi rəqiblərimiz var. Amma məqsədimizə çatmağa çalışacağıq. Biz addım-addım irəliləyirik. Qazana biləcəyimiz 27 xal var. Bu oyundan sonra futbolçulara istirahət verəcəyik. Qarşıdan gələn Novruz bayramı münasibətilə hər birinizi təbrik edirəm. Beşinci gündən etibarən qarşıdakı oyunumuza hazırlaşacağıq. Hər komanda güclənmək istəyir. Bəzi oyunçularımız zədəlidir. Mövqeləri gücləndirməliyik. "Transfer pəncərəsi" açıq olanda, yeni oyunçuların dəvət edilməsi normal haldır.
- Nəticə bəllidir. Oyun keyfiyyətindən razı qaldınız?
- Keyfiyyət sadəcə hücum deyil, bəzən müdafiə olunmaqdır. "Liverpul" hər şeyi udanda Avropada ən yaxşı müdafiə olunan komanda idi. Bəzi oyunçularımız zədəli idi. Bunlar da oyunumuza təsir etdi. İlk yarıda hücum sarıdan yaxşı oynadıq.
- Ardıcıl ikinci qələbənizi qazanırsınız. Buna baxmayaraq, yəqin ki, sizi narahat edən problemlər də var...
- Çox da irəliyə gedərək, nələr olacağını deyə bilmərəm. Amma bir şeydən razıyam ki, bəzi məqamlar var və oyun müddətində daha sakit ola bilərik. Bəzi oyunçular öz davranışlarını dəyişməlidirlər. Amma əmin deyiləm ki, onlar bunu edə biləcəklər, ya yox. Kim dəyişəcəksə, inkişaf etmək istəyəcəksə, xoş gəlib, bizimlədir. Kim dəyişməyəcəksə, üzgünəm. Həmin oyunçunu dəyişəcəyik. Təkcə bizdə yox, bu cür proseslər hər komandada var. Hər şey daha yaxşı olacaq.
- Hesab 2:0 olduqdan sonra komandanızın müdafiə olunmasından razı qaldınız?
- Yaxşı müdafiə olunduq, sadəcə, bəzi səhvlərə yol verdik. Ancaq normaldır. 10 gün ərzində bəzi şeyləri müsbət mənada dəyişmişik. Daha məsuliyyətli oynayırıq. 10-15 günə çox şeyi dəyişmək olmur.
- Amma müdafiə olunanda komanda düşünülmüş şəkildə hücuma çıxmırdı...
- Son 15 dəqiqədə təzyiq altındaydıq. Emmanuel Apehi meydana daxil etdim ki, hücumda top saxlaya bilsin. Oyunun qırılma nöqtəsi var idi. Top Xəyalda olarkən Jael Marqaritaya ötürmə versəydi, təkbətək qalacaqdı. Xəyal gəncdir, belə epizodlarla artıracaq. Oyuna daxil olduqdan sonra yaxşı işlər gördü.