"Kəpəz" Azərbaycan Premyer Liqasının XXVII turunda səfərdə "Zirə"yə 1:2 hesabı ilə məğlub olub.

Prosport.Az xəbər verir ki, Gəncə təmsilçisinin baş məşqçisi Adil Şükürov matçdan sonra keçirilən mətbuat konfransında jurnalistlərin suallarını cavablandırıb:

- Azarkeşlərimizə təşəkkür edirəm. Komanda bu gün tam istədiyimiz kimi mübarizə aparmadı. Oyunda bəzi çatışmazlıqlarımız oldu. Bunun qarşısını almalıyıq. Növbəti turlarda çalışacağıq ki, itirdiyimiz xalları bərpa edək.

- Ev oyunlarını keçirmək üçün stadion tapa bilmirsiniz. Bu komandaya təsir edir?

- Futbolçulara bildirmişik ki, bu mövsümdə də, növbəti mövsümdə də bütün oyunlarımızı səfərdə keçirəcəyik. Hər oyuna səfər kimi yanaşırıq. Böyük təsiri yoxdur. Yaxın regionda oynasaq, çox azarkeşimiz gəlsə, komanda daha inamlı oynayar.

- Yeni mövsüm üçün "gözaltı" etdiyiniz oyunçular var?

- Komandadakı bütün futbolçulara güvənirik. Bəzən oyunçularda eniş olur. Bunun qarşısını almağa çalışacağıq.

- Oyununuzda nə çatmadı?

- Aqressiya çatmadı. Bunu futbolçulara tapşırmışdıq. Komanda ilə iclasda bu barədə danışacağıq.

- Rəqib 1:0 öndə olarkən bir epizod oldu. Siz də həmin anda "Zirə"nin futbolçusuna ikinci sarı vərəqə verilməsini tələb etdiniz. O epizoda oyunun qırılma nöqtəsi demək olar?

- Rəqib 10 nəfərlə qalsa, tam başqa oyun olacaqdı. Yəqin ki, hakim fərqli görüb. Razılaşmaqdan başqa heç nə edə bilmərik. Toxunuş var idi.