Azərbaycan Basketbol Federasiyasının (ABF) prezidenti Emin Əmrullayev “Sabah” və “Gəncə” komandaları arasında keçirilən çempionatın final oyunundan sonra Prosport.Az-ın da müxbirinin yer aldığı brifinqdə sualları cavablandırıb:
– Əvvəlcədən bilirdik ki, tərəflər arasında 5 oyun olsa, basketbolun ölkədə sevilməsi üçün yaxşı olacaq. Bu oyun hər şey – həyəcan, dramatiklik var idi. Qalibləri təbrik edirəm və uğurlar arzu edirəm. Qalib əslində Azərbaycan basketbolu oldu. Növbəti mövsümlərdə daha maraqlı liqa izləmək arzusu ilə ayrılırıq.
– Avrokuboklara komandalarımız gedəcək? Əgər yollanacaqsa, neçə komanda ilə təmsil olunacağıq?
– Bununla bağlı tələblər ola bilər. Hazırda qitə qurumu ilə danışıqlar gedir. Federasiya olaraq avrokuboklarda iştirak etmək istəyirik. İyunun sonlarında biləcəyik. Biz istəyirik və inanırıq ki, alınacaq. Ciddi maneə görmürük.
– Hansı komandaya azarkeşlik edirsiniz?
– Mən basketbola azarkeşlik edirəm, dəstəklədiyim komanda yoxdur.
– Gələn mövsüm reqlamentdə dəyişiklik olacaq?
– İstəyirik ki, klubların sayı çox olsun. Bir çox klubların marağı var. Çalışacağıq ki, cəlb edək. Növbəti mövsüm 10-12 komandalı çempionat təşkil etmək istəyirik.
– Bölgə klublarının gəlişi gözlənilir?
– Bəli. Basketbolun coğrafiyasını genişləndirmək istəyirik.
– Legioner limiti ilə bağlı dəyişiklik olacaq?
– Klubların sayının artması əcnəbi limitinin 4+1 olmaq ehtimalını artır. Yerli oyunçuların sayı hələ o qədər çox deyil. Hazırda klub sayının artırılması yönündə çalışırıq
– Millinin baş məşqçisi ilə bağlı qərar veriləcək?
– Kişilərdən ibarət Azərbaycan millisi C divizionunda çıxış edir. Növbəti mövsümdən ənənəvi seçmə turnirlərə qatılmağı düşünürük. İlkin təsnifat mərhələsində oynaya bilərik. Bu, FIBA ilə noyabrda aparılacaq danışıqlardan asılı olacaq. Təsnifat mərhələlərində qalib olsaq, ənənəvi turnirə qatılacağıq. Əks təqdirdə, yəqin ki, növbəti il də C divizionunda oynayacağıq. Bu dəqiqləşəndən sonra milli komandanın baş məşqçisi məsələsi ilə bağlı qərar da verəcəyik. Hazırda müzakirə mövzusu deyil. Yerli məşqçilərin və seleksiyaçıların daimi nəzarəti var. Ayrı-ayrı milli oyunçuları və namizədlərlə bağlı statistika toplanır. Yığmanın vaxtı çatanda bununla bağlı qərar statistikalara uyğun veriləcək.
– "Qarabağ" FK və "Turan Tovuz" PFK rəsmiləri bu oyunu izlədilər. Bu klublar gələn mövsüm çempionatda çıxış edəcəklər?
– Hələ ki nəsə demək çətindir. İstəyimiz daha çox klubun olmasıdır. Hansı klubların olacağını indi demək düzgün olmaz.
– Futbolda federasiya klublara dəstək olur. Basketbolda da bu mövsüm belə oldu. Gələn mövsüm necə olacaq?
– Bu il əldə olunmuş nailiyyətlərlə sponsor cəlb ediləcəyinə inanırıq. İstəyimiz budur.
– "Neftçi"nin Müşahidə Şurasında yer alırsınız. Klub Azərbaycan kubokunun finalında "Qəbələ" ilə qarşılaşacaq. Fikirləriniz necədir?
– Yalnız basketbolla bağlı suallara cavab vermək istəyirəm.