“Bu döyüşə heç vaxt olmadığım qədər hazıram”.

Prosport.az-ın məlumatına görə, bunu Azərbaycanın yüngül çəkidə MMA döyüşçüsü Rafael Fiziyev ABŞ idmançısı Castin Qeyciyə qarşı keçirəcəyi görüş öncəsi mətbuat konfransında deyib.

30 yaşlı idmançı döyüşü səbirsizliklə gözlədiyini bildirib: “Geyci mənə qalib gəlmək istəyirsə, sona qədər döyüşməlidir. O yaxşı mübarizə aparır, ayaq zərbələrini sevir. Mənim güclü başım var, onda isə yoxdur. Mənə qarşı ən yaxşı Qeyci gözləyirəm. Onun mümkün olan ən yaxşı formada olmasını istəyirəm. Çünki Castinə çətin döyüş göstərmək fikrindəyəm”.

Fiziyev bildirib ki, Qeyciyə qalib gəldikdən sonra titul uğrunda mübarizədə braziliyalı Şarles Oliveyra və ya amerikalı Beneil Dariuşla qarşılaşmaq istəyir: “Castinə qalib gəldikdən sonra Dariuşla Oliveyra arasındakı döyüşün qalibi ilə titul uğrunda mübarizə aparmaq imkanı versələr, etirazım olmayacaq. Fikrimcə, Dariuş bizim divizionda çempionla döyüşməyə hamıdan çox layiqdir. Onunla qarşılaşmaq şansı yaransa, sevinərəm”.

Rafael Fiziyev bu idman növünü seçməsinin səbəbini də izah edib: “Atam döyüş idman növlərinin həvəskarıdır. O, hətta küçə döyüşlərini də sevir. Buna görə də məni və bütün əmim oğlanlarını bir-birimizlə döyüşdürərdi. 2 dollar da mükafat qoyardı. Hətta bunun üçün əlcəklər almışdı. Hələ orta məktəbə getmirdim, təxminən 5 yaşım var idi. Vəhşi kimi döyüşürdük. Çünki 2 dollar səni kənddə varlı edirdi”.

Qeyd edək ki, Rafael Fiziyevlə Castin Qeyci arasında döyüş martın 18-dən 19-na keçən gecə İngiltərənin paytaxtı Londonda keçiriləcək.