Azərbaycan boksçusu Nicat Hüseynov Paris-2024 Yay Olimpiya Oyunlarına lisenziya qazanıb.

Prosport.Az xəbər verir ki, 51 kq çəkidə mübarizə aparan ikiqat Avropa çempionu bu uğura İtaliyanın Busto Arsitsyo şəhərində keçirilən I Dünya Olimpiya Təsnifat Turnirinin 1/4 finalında Roskoe Hillə (ABŞ) qalib gəlməklə nail olub.

Dünya çempionatının gümüş medalçısı olan amerikalı rəqibini 3:2 hesabı ilə məğlub edən yığma üzvü yarımfinala yüksəlməklə lisenziyaya sahib olub.

Sərxan Əliyev (71 kq) isə Aslanbəy Şımberqenova 0:5 uduzmaqla bu şansını əldən verib. Beləliklə, boks yığmamız Apennin yarımadasından cəmi 1 lisenziya ilə qayıdır.

Nəticədə boks yığmamızın Paris-2024-ə qazandığı vəsiqələrin sayı 3-ə yüksəlib. Nicat Hüseynovdan öncə III Avropa Oyunlarında Murad Allahverdiyev (80 kq) və Məhəmməd Abdullayev (+92 kq) Olimpiadada iştirakını rəsmiləşdirib.

Xatırladaq ki, növbəti – sonuncu lisenziya turniri Tailandın paytaxtı Banqkokda keçiriləcək. Həmin yarış 23 may - 3 iyun tarixlərində baş tutacaq.

Qeyd edək ki, bununla da ümumilikdə Azərbaycanın qazandığı lisenziyaların sayı 10-a çatıb.