"Qarabağ"ın 15 yaşadək komandası AFFA U-15 Liqasında mövsüm ərzində 2-ci məğlubiyyətlə üzləşib.

Prosport.Az-ın xəbərinə görə, II dövrənin ilk turu sayılan XXIII turda "Qarabağ" Abşeron Olimpiya İdman Kompleksinin stadionunda İsgəndər Cavadov Bakı Futbol Akademiyası (İCBFA) ilə qarşılaşıb.

Premyer Liqa oyunlarında da gördüyümüz hakim Səbuhi Bayramovun idarə etdiyi görüşdə sensasiya yaşanıb. Ötən tur Mingəçevirdə heç bir qələbəsi olmayan autsayder "Ulduz"a 0:1 uduzmuş İCBFA bu dəfə sürpriz nəticəyə imza atıb. Meydan sahibləri Timur İbrahimovun 16 və 22-ci dəqiqələrdə etdiyi dublla qalib gəlib – 2:0. Bu matçda "köhlən atlar"ın bombardiri və pleymeykeri Əli Bəşirovun xəstəliyi səbəbindən meydana çıxmaması da komandanın oyununa təsirsiz ötüşməyib.

Bu, son 2 turda rəqiblərini 6:0 məğlub edən "Qarabağ"ın cari mövsüm "Sumqayıt"la oyundan sonra 2-ci yenilgisi olub. İCBFA isə mövsüm ərzində 3-cü qələbəsini qazanıb.

Qeyd edək ki, "Qarabağ" ilk dövrədə – oktyabrın 21-də keçirilmiş ilk matçda bu rəqibini 11:0 hesabı ilə darmadağın etmişdi. Bu nəticədən sonra "Qarabağ" liderliyini əldən verib. Komanda hazırda 57 xalla 2-ci sırada qərarlaşıb. İlk sırada 58 xalla "Sabah" qərarlaşıb.