Ümumdünya Taekvondo Şurası bu gün növbəti dünya çempionatının ev sahibini Bakıda keçirdiyi iclasda müəyyənləşdirib.

Prosport.Az-ın məlumatına görə, Bakının ardınca Çinin Usi şəhəri 2025-ci ildə keçiriləcək dünya çempionatına ev sahibliyi edəcək.

Usi Sofiya (Bolqarıstan), Zaqreb (Xorvatiya) və Şarlott (ABŞ) şəhərlərini qabaqlayıb. Səsvermə zamanı 26 mümkün səsdən 14-ü Çin şəhərində keçirilməni dəstəkləyib. Artıq 1997-ci ildə Honq Konq və 2007-ci ildə Çinin paytaxtı Pekin taekvondo üzrə dünya çempionatına ev sahibliyi edib. 

Həmçinin, Şura yeganə namizəd olan BƏƏ-nin Füceyrə şəhərini 2025-ci ildə keçiriləcək yeniyetmələr arasında dünya çempionatına ev sahibi kimi təsdiqləyib. 

İclas zamanı Namibiyanın üzv milli assosiasiya olması da təsdiqlənib. İndi Afrika ölkəsi Ümumdünya Taekvondosunun (WT) 213-cü üzvüdür.

WT-nin koreyalı prezidenti Çu Ça-van Sinqapur Taekvondo Federasiyasının fəaliyyətinin dayandırılması ilə bağlı qərarın aradan qalxdığını bildirib.

Beynəlxalq Olimpiya Komitəsinin Mədəniyyət və İrs Komissiyasının üzvü Castin Hou isə Taekvondo Humanitar Fonduna verdiyi töhfələrə və qaçqın və köçkünlərlə əlaqələr zamanı fədakarlığına görə Taekvondo Humanitar Səfiri təyin edilib.

Qeyd edək ki, sabah saat 09:00-dan etibarən Bakıda dünya çempionatı start götürəcək. Bu mötəbər yarışda 144 üzv assosiasiyanın 950-dən çox idmançısı və 730-dan çox rəsmisi (məşqçi, tibbi heyət), eləcə də 1 Qaçqın komandası iştirak edəcək.

Xatırladaq ki, Bakı daha əvvəl 2009-cu ildə para taekvondo üzrə dünya çempionatına, 2014-cü ildə ilk dəfə keçirilən yeniyetmələrin dünya çempionatına və 2016-cı ildə Dünya Qran Prisi finalı, Qala Mükafatlandırma və komandalar arası Dünya Kubokuna ev sahibliyi edib.

Səbuhi Musa