Azərbaycan güləşçisi Elis Manolova (65 kq) Rumıniyanın paytaxtı Buxarestdə keçirilən Avropa çempionatında bürünc medal qazanıb.

Prosport.Az xəbər verir ki, 28 yaşlı idmançı 3-cü yer uğrunda görüşdə rəqibini üstələyib. Avropa çempionu həlledici görüşdə Almaniya təmsilçisi Ane Nürnberqeri 2:1 məğlubiyyətə uğradıb. Bu onun 5-ci Avropa medalı olub.

Elis Manolovadan fərqli olaraq, Birgül Soltanova (62 kq) bürünc mükafat uğrunda dueldən məğlub ayrılıb.

Beləliklə, qadın güləşçilərimiz Avropa çempionatını 3 medalla başa vurub. Daha əvvəl Mariya Stadnik (50 kq) və Alyona Kolesnik (59 kq) qitə çempionu olublar. Bu nəticədən sonra Azərbaycan 83 xalla Avropa çempionatını 4-cü pillədə başa vurub. Ukrayna, Türkiyə və meydan sahibi Rumıniya ilk "3-lüy"ü tutub.

Qeyd edək ki, yunan-Roma güləşçilərdən Nihat Məmmədli (60 kq), Murad Məmmədov (63 kq), Həsrət Cəfərov (67 kq) 1-ci, Rəşad Məmmədov (55 kq), Ülvü Qənizadə (72 kq) 2-ci və Beka Kandelaki (130 kq) 3-cü yeri tutub.