Rumıniyanın paytaxtı Buxarestdə keçirilən Avropa çempionatında yunan-Roma güləş komandamız 2-ci olub.

Prosport.Az xəbər verir ki, son gündə Azərbaycanın daha 2 güləşçisi Avropa çempionu olub, 1-i gümüş medal qazanıb.

Ötən gün finala yüksələn Nihat Məmmədli (60 kq) və Həsrət Cəfərov (67 kq) həlledici dueldə müvafiq olaraq Viktor Çobanuya (Moldova) və Ruslan Biçurinə (AIN) qalib gələrək, fəxri kürsünün ən yüksək pilləsinə qalxıb. Nihat ilk dəfə, Həsrət isə ardıcıl 2-ci dəfə Avropa çempionu olub.

Finalda Səlçuk Cana (Türkiyə) məğlub olan Ülvü Qənizadə (72 kq) isə 2-ci yeri tutub. Həmçinin, bu çəkidə Ukraynanı təmsil edən azərbaycanlı Pərviz Nəsibov bürünc medal qazanıb.

Bu gün mübarizəyə qoşulan qadın güləşçilər Mariya Stadnik (50 kq) və Alyona Kolesnik (59 kq) isə finala yüksəlib. Onlar sabah həlledici görüşlərdə müvafiq olaraq Evin Demirhan (Türkiyə) və Alina Filipoviçlə (Ukrayna) qarşılaşacaq.

Qeyd edək ki, ötən gün digər yunan-Roma güləşçilər – Murad Məmmədov (63 kq) qızıl, Rəşad Məmmədov (55 kq) gümüş, Beka Kandelaki (130 kq) isə bürünc medal qazanıb. Ümumi nəticədə bu millimiz 2 qızıl medal qazanmış Türkiyənin ardından 142 xalla Avropa 2-cisi olub. Xatırladaq ki, ötən il də Türkiyə 1-ci, Azərbaycan 2-ci olmuşdu. Komandamız bu dəfə türklərə cəmi 5 xalda geri qalıb. Ermənistan isə 3-cü yeri tutub.