Rumıniyanın paytaxtı Buxarestdə keçirilən Avropa çempionatında Azərbaycanın yunan-Roma güləşçiləri bir dəst medal qazanıb.

Prosport.Az xəbər verir ki, onlardan 1-i qızıl, 1-i gümüş, 1-i bürünc medal olub.

Murad Məmmədov (60 kq) həlledici görüşdə ukraynalı Aleksandr Qruşinlə güləşib. Gərgin mübarizə şəraitində keçən qarşılaşmada 2:1 hesabıyla qalib gələn Murad qızıl medala sahib çıxıb. Bununla da Məmmədov Avropa çempionatında medal kolleksiyasını tamamlayıb. Güləşçimiz buna qədər analoji yarışda gümüş (2018) və bürünc (2022) medal qazanmışdı.

Avropa çempionatında debüt edən Rəşad Məmmədov (55 kq) finalda moldovalı Artyom Delyanuyla qarşılaşıb. Güləşçimiz hesabda öndə olarkən ani bir səhvin qurbanı olub. Rəqibinə “tuş”la məğlub olan Rəşad ilk dəfə qatıldığı qitə birinciliyində gümüş medal qazanıb.

Beka Kandelaki (130 kq) norveçli Oskar Marviklə 3-cü yer uğrunda güləşib. Təmsilçimiz hesabda geri düşsə də, əzmkarlıq nümayiş etdirərək xalların keyfiyyətinə görə (2:2) qələbə qazanıb və Avropa çempionatında ilk dəfə fəxri kürsüyə qalxıb.

İslam Abbasov (87 kq) bürünc medal uğrunda görüşdə olimpiya, dünya və Avropa çempionu Jan Belenyukla mübarizə aparıb. Ukraynanı təmsil edən təcrübəli güləşçi minimal hesablı qələbə qazanıb – 2:1 və İslam medalsız qalıb.