Azərbaycanın 2 yunan-Roma güləşçisi Rumıniyanın paytaxtı Buxarestdə keçirilən Avropa çempionatında finala yüksəlib.

Prosport.Az xəbər verir ki, Rəşad Məmmədov (55 kq) yarımfinalda gürcüstanlı dünya çempionu Nuqzar Tsurtsumiaya (5:1) qalib gəlib.

Murad Məmmədov (63 kq) finala gedən yolda Rusiya təmsilçisi Ənvər Allahyarovu (AIN) (3:3) xalların keyfiyyətinə görə üstələyib.

İslam Abbasov (87 kq) Serbiyanı təmsil edən rus güləşçi Aleksandr Komarova uduzduğu (1:3) üçün bürünc medal uğrunda qarşılaşmaya çıxacaq.

Yarımfinalda Türkiyə təmsilçisi Rza Kayaalpa yenilən Beka Kandelaki (130 kq) də medal şansını davam etdirir.

1/4 finalda məğlub olan Sənan Süleymanov (77 kq) rəqibi finala çıxa bilmədiyi üçün yarışı medalsız başa vurub.

Qeyd edək ki, bu çəkilərdə medal qarşılaşmaları sabah olacaq. Yarış fevralın 18-də başa çatacaq.

19:05

Azərbaycanın 4 yunan-Roma güləşçisi Rumıniyanın paytaxtı Buxarestdə keçirilən Avropa çempionatında yarımfinala yüksəlib.

Prosport.Az xəbər verir ki, Rəşad Məmmədov (55 kq), Murad Məmmədov (63 kq), İslam Abbasov (87 kq) və Beka Kandelaki (130 kq) finala çıxmaq uğrunda mübarizə aparacaqlar.

İdmançılar yarımfinalda, müvafiq olaraq, Nuqzari Tsurtsumia (Gürcüstan), Ənvər Allahyarov (AIN), Aleksandr Komarov (Serbiya) və Rza Kayaalp (Türkiyə) ilə qarşılaşacaq.

Azərbaycanın digər təmsilçisi Sənan Süleymanov 1/4 finalda xorvatiyalı Antonio Kamenyaseviçə məğlub olub. Rəqib finala yüksəlsə, güləşçimiz təsəlliverici görüşlərdə iştirak hüququ əldə edəcək.

Yarımfinal qarşılaşmaları Bakı vaxtı ilə saat 20:00-da başlayacaq.

Qeyd edək ki, Azərbaycan fevralın 18-dək davam edəcək Avropa çempionatında 25 güləşçi ilə təmsil olunur.