Beynəlxalq Boks Assosiasiyası (IBA) fevralın 16-da Tacikistanın paytaxtı Düşənbədə “IBA Çempionlar Gecəsi” təşkil edəcək.

Prosport.Az xəbər verir ki, turnirdə Azərbaycan boksçusu Alfonso Dominqes (86 kiloqram) də qüvvəsini sınayacaq.

“Tokio-2020” Yay Olimpiya Oyunlarının bürünc mükafatçısı çempionluq kəməri uğrunda döyüşdə rusiyalı Şarabuddin Atayevlə üz-üzə gələcək.

Görüşün mükafat fondu 500 min ABŞ dollarıdır. Qalib boksçu 350 min dollar, məğlub olan idmançı isə 150 min dollar qazanacaq.

Qeyd edək ki, Alfonso Dominqes və Şarabuddin Atayev daha əvvəl 3 dəfə qarşılaşıb. Bunların 1-də Azərbaycan təmsilçisi, 2-də isə Rusiya boksçusu qalib gəlib.